Dita ndërkombëtare e fëmijëve i ka gjetur të vegjëlit e Laçit me një infrastrukturë arsimore tërësisht të re.
Zinxhiri i edukimit në këtë qytet tashmë është i plotësuar sa i takon standardeve në kopsht, 9-vjeçare dhe gjimnaz.
Tre institucionet kryesore arsimore të Kurbinit, shkolla 9-vjecare, gjimnazi i qytetit, si dhe kopshti Nr.1 pas rikonstruksionit kanë marrë një pamje të re dhe ofrojnë të gjitha kushtet e nevojshme për fëmijët dhe nxënësit.
I rrethuar nga fëmijët e këtyre shkollave, Kryeministri Rama u shpreh se investimet do të vazhdojnë edhe me një paketë të re financimi të ndërtimit dhe rindërtimit të infrastrukturës arsimore dhe shëndetësore në të gjithë vendin.
“Në buxhetin e vitit tjetër kemi një tjetër paketë të rëndësishme, me 300 qendra shëndetësore në të gjithë Shqipërinë me standarde europiane dhe me po kaq shkolla të rindërtuara kompletojmë më në fund të gjithë nevojën e trashëguar prej çerekshekulli që faktikisht na mbeti në dorë me gjithë këto gërmadha të tmerrshme nga të katër anët e Shqipërisë për shkak të mungesës së prioritizimit dhe të vëmendjes të fokusuar hap pas hapi,” deklaroi Kryeministri Edi Rama.
Ministrja e Arsimit, Sporteve dhe Rinisë Lindita Nikolla shtoi se ky “është një investim prej 100 milionë lekësh të reja dhe se përfundimi i investimit do ta kthejë realisht edhe në një Shkollë Qendër Komunitare, sepse janë të gjitha parametrat në projekt që të mundësohet më shumë aktivitet edhe për komunitetin”.
“Është mbyllur korpusi, kopshti, kjo 9-vjeçare që ishte më në nevojë për investim edhe gjimnazi, që, që nga viti 60 edhe ai nuk kishte pësuar asnjëherë një investim në infrastrukturë,”- nënvizoi ministrja e Arsimit, Lindita Nikolla.
Kryeministri Rama u ndal edhe në qendrën e qytetit ku inspektoi sheshin e rindërtuar dhe hapësirat e rikualifikuara përreth në saj të Rilindjes Urbane.
