I gjithë angazhimi ynë përgjatë vitit 2020 ishte rindërtimi prej pasojave të tërmetit të 26 nëntorit.
Kështu u shpreh për ATSH-në kryetari i bashkisë së Krujës, Artur Bushi, i cili theksoi se “do të ndërtohen gjithsej 1855 banesa në pallate dhe shtëpi individuale për banorët e dëmtuar nga tërmeti”.
“Konkretisht në njësinë Thumanë janë në ndërtim 158 banesa individuale dhe 14 pallate për akomodimin e 278 familjeve brenda lagjes së re. Ndërsa në Bubq janë 77 familje me banesa individuale, 45 apartamente, 8.7 ha dhe 591 familje të prekura gjithsej”, – tha Bushi.
Kryetari Bushi u shpreh se “nis së shpejti edhe puna për ndërtimin e 15 pallateve ku do të akomodohen 120 familje. Në total 228 familje do të akomodohen brenda lagjes së re në Fushë-Krujë”, – shtoi Bushi për ATSH-në.
“Jo pak, por 5350 familje u dëmtuan nga lëkundjet e mëdha të tërmetit, çka do të thoshte një punë stërmunduese nga faza e verifikimeve të dëmeve, bonusi qirasë, aplikimi i banorëve, përgatitja e planeve vendore, procedurat e shpronësimeve, demolimi i objekteve të dëmtuara dhe deri në ngritjen e banesave të reja”, – nënvizoi Bushi.
Kryebashkiaku Bushi u shpreh për ATSH-në se “ishte një sfidë që kërkonte çdo angazhim të kujtdo punonjësi, pa orare, punë edhe në fundjava, durim dhe e angazhim si kurrë më parë. Bashkia Krujë si asnjë bashki tjetër, kishte 4 site ndërtimi në Krujë, Fushë Krujë, Thumanë dhe Bubq. Po ashtu plot 13 shkolla të dëmtuara, ç’ka rrezikonin të kolapsonin procesin mësimor e për të cilën na u desh të mbështeteshim në mirëkuptimin e prindërve dhe punës së madhe së mësuesve”.
Ndërkohë, vijoi Bushi, edhe shkollat ishin prioritet përgjatë vitit 2020 ku është nisur puna në shkollat 9-vjeçare në Derven, Luz, Larushk, Qerekë, Thumanë, Budull dhe Bubq.
“Ndërsa 6 godinat e tjera arsimore nisin punë gjatë vitit 2021”, – tha Bushi.
Kryebashkiaku Bushi e cilësoi rindërtimin si “një nga projektet më ambicioze që qeveria shqiptare ka ndërmarrë, për ti realizuar shpejt dhe në cilësi”.
“Grantet për nivelet e dëmet DS1- DS3 kanë përfunduar në masën më të madhe dhe 2500 familje kanë tërhequr paratë për riparimin e shtëpisë së tyre. Ndërkohë, ne Thumanë dhe Fushe Kruje ka përfunduar puna në infrastrukturën nëntokësore dhe bazamentin e truallit dhe vijon puna në ngritjen e banesave individuale”, – tha Bushi.
Sipas tij, në Bubq po punohet në infrastrukturën nëntokësore, punë e cila do të vijojë deri në mars.
Kryetar Bushi bën të ditur se “në Krujë është miratuar Plani i Ri i Detyruar Vendor dhe ne Janar nis demolimi i pallateve dhe hapja e kantierit të rindërtimit”.
Lidhur me restaurimin e kalasë, që u dëmtua nga tërmeti, Bushi sqaron se “Kalaja e Krujës është zona historike me e dëmtuar në Shqipëri prej tërmetit. Në fazat emergjente është punuar fort kjo falë mbështetjes nga Ambasada Amerikane, në Teqenë e Dollmës dhe Kullën e Sahatit”.
“Pajantimi si masë e parë është mbyllur, ndërkohë jemi në pritje të përmbylljes së projekteve për Kullën e Sahatit, përforcimin e shkëmbit dhe restaurimin e banesave brenda Kalasë”, – tha Bushi për ATSH-në.
/a.r
