Këshilli i Ministrave është mbledhur këtë të mërkurë dhe ka marrë disa vendime. Një prej tyre ka të bëjë me rindërtimin dhe e njoftoi zv/kryeministri Arben Ahmetaj. Ai tha se ka filluar procesi i kalimit të shkollave në pronësi të bashkive.
“Filloi procesi i kalimit të shkollave në pronësi të bashkive. Jemi duke folur për përfundimin e një numri të madh shkollash të rindërtuara që u kalojnë bashkive për administrim në vijim. Një lajm shumë i mirë”, tha Ahmetaj.
Zv/kryeministri tha se muaji Nëntor do të jetë shumë i rëndësishëm për procesin e rindërtimit për familjet e dëmtuara.
“Në vigjiljen e 2-vjetorit të asaj ngjarje kemi procesuar për të kaluar në pronësi të plotë, të qytetarëve, të familjeve të dëmtuara, shtëpitë, njësi individuale dhe apartamente”, tha Ahmetaj.
Zv/Kryeministri tha se brenda periudhës 20-26 Nëntorit do të shpërndahen rreth 1050 shtëpi të rindërtuara.
“Vetëm mes periudhës së datave 20-26 nëntor do të shpërndahen gati 1050 apartamente dhe njësi individuale”, tha Ahmetaj.
Ai u shpreh se shpërndarja do të bëhet bazuar në dy lista. Ahmetaj tha se në listën prioritare shpërndarja do të bëhet e menjëhershme, ndërsa për pjesën tjetër do të bëhet me short..
“Shorti do të bëhet edhe në qendra të hapura. Është detyrim, i bashkive që të fillojnë të organizojnë shortet publike transparente për të shpërndarë apartamentet dhe njësitë individuale”, tha Ahmetaj.
Besojmë që deri në fund të shtatorit të viti tjetër do të kemi shpërndarë të gjitha apartamentet.
