Kryeministri Edi Rama ishte në Vlorë ku vizitoi nga afër Lungomaren së bashku me Komisionerin për Zgjerimin në BE Johanes Hahn.
Duke folur nga shëtitorja, Rama theksoi se projektet e “Rilindjes Urbane” nuk janë thjesht investime për zbukurim sipërfaqësor por kanë sjellë zhvillim të gjithëanshëm në zonat ku është ndërhyrë.
“Ajo që dua të theksoj është se tanimë Vlora, po jo vetëm Vlora, të gjitha qytetet ku kemi ndërhyrë me këto projekte janë prova se rilindja urbane është një program që nuk vjen për të zbukuruar në kuptimin sipërfaqësor por vjen për të nxitur ekonominë, turizmin, punësimin, dhe patjetër edhe një zhvillim social. Nëse dikush do më shumë prova, mjafton të kalojë me një sy të shpejtë, çmimet e metrit katror në të gjitha zonat ku është ndërhyrë, nga Tropoja në Konispol. Sa vlenin pasuritë para ndërhyrjeve, dhe sa vlejnë pas ndërhyrjeve. Vlera është rritur në mënyrë të ndjeshme dhe vijon të rritet”, deklaroi Rama.
Më tej rama tha se Qeveria zotohet të lidhë Vlorën me Himarën përmes aksit rrugor ekzistues por të rinovuar sipas standardeve të BE, ose nga një tunel që do kalojë përmes Llogarasë. Lajmin e dha kryeministri Edi Rama ka Vlora në prani të komisionerit Johannes Hahn, gjatë inspektimit të Lungomares.
“Do transformojmë aksin që na çon nga Radhima në Orikum. Po përgatisim edhe ndërhyrjen në vijën bregdetare të Orikumit. Po diskutojmë të finalizojmë projektin nga Orikumi, përmes Llogarasë e deri poshtë në Himarë. Po diskutojmë dy variante, atë të rrugës ekzistuese me standarde të BE dhe një aks pjesërisht të ri, me tunelin në Llogara”,tha kryeministri.
/a.m.
