Media europiane, Euobserver ka botuar një artikull mbi mundësinë e rikthimit të vizave në Ballkanin Perëndimor bazuar në dokumentin e brendshëm të BE -së të 27 shtatorit i cili është prezantuar përpara samitit të BE-Ballkani Perëndimor në 6 tetor në Slloveni.
Sipas artikullit, Franca, Gjermania dhe Italia, Belgjika dhe Republika Ceke kanë shprehur zhgënjim mbi abuzimin e lëvizjes së lirë afatshkurtër, ndaj disa vende të Lindjes dhe Ballkanit Perëndimor.
Në dokument, thuhet, se ka një rritje me më shumë se 50 % të qëndrimeve të jashtëligjshme të aplikantëve për azil dhe kjo ka bërë që rikthimi i vizave të jetë objekt diskutimi në rritje në gjirin e shteteve anëtare të Bashkimit Europian.
Në dokument, Gjermania shënjestroi kryesisht Gjeorgjinë, Moldavinë dhe Ukrainën. Ajo gjithashtu fajësoi Shqipërinë dhe Serbinë si ndër 10 vendet kryesore problematike për kërkesat e pabazuara të azilit.
Ajo regjistroi rritje në “shkeljet e paautorizuara të qëndrimit” nga Shqipëria, Moldavia dhe Ukraina – pavarësisht një rënie të përgjithshme vitin e kaluar për shkak të pandemisë.
Shqetësim për numrin e lartë të kërkesave të pabazuara të azilit nga Shqipëria ka dhe Franca, që citohet të jetë gjithashtu e pakënaqur me Shqipërinë dhe Gjeorgjinë dhe mbetet e kujdesshme ndaj serbëve.
Pika kyçe e artikullit ka të bëjë me alarmin që nge dokumenti i shteteve anëtare të BE-së “Në rast të një përmirësimi të vogël ose aspak të çështjes së kërkesave të azilit nga vendet e treta, Komisioni Evropian duhet të theksojë se fillimi i mekanizmit të pezullimit të vizave është një opsion i vërtetë,” citohet dokumenti i delegacionit gjerman në artikull.
“Qytetarët nga Mali i Zi, Serbia dhe Maqedonia e Veriut janë lejuar të udhëtojnë në BE pa vizë deri në 90 ditë që nga dhjetori 2009. Kjo u pasua në 2010 me Shqipërinë dhe Bosnë dhe Hercegovinën, Moldavinë në 2014, dhe Gjeorgjinë dhe Ukrainën në 2017. Udhëtimi pa viza shihet nga Komisioni Evropian si një “arritje e rëndësishme” në marrëdhëniet midis BE-së dhe Ballkanit Perëndimor dhe republikat ish-shteteve sovjetike nën ombrellën e politikës së saj të “Partneritetit Lindor”.
Holanda është shteti i parë dhe i vetëm i BE-së që deri më tani ka kërkuar pezullimin e lëvizjes së lirë për Shqipërinë. Por kërkesa e saj, kundër Shqipërisë në vitin 2019, u refuzua nga Komisioni Evropian.
/b.h
