Prej 4 vjetësh shteti ka humbur miliarda lekë nga mbyllja e lojërave të fatit. Kështu shpreh në studion e Debatit në A2 CNN presidenti i KOKSH-it Fidel Ylli, sipas të cilit këto para i ka marrë rruga, pasi shteti ishte i pafuqishëm që këto që i mbylli me ligj t’i kontrollonte. Ai theksoi se shtete më të fuqishme si SHBA-ja dhe Italia, kanë dështuar me këto nisma në përpjekje për të ruajtur qytetarët.
“Që nga 1920 SHBA dështoi me ligjin e alkoolit dhe më pas lulëzoi mafia dhe e kapi duke korruptuar gjyqtarë e prokurorë. E njëjta gjë ndodhi edhe në Itali në vitet ’80 që i mbylli lojërat e fatit dhe i kapi mafia”.
Ai tha se ka kërkuar nga qeveria që lojërat e fatit t’i komandojë shteti, pasi ato ekzistojnë në mënyrë informale.
“Lojërat e fatit nuk kërkojmë t’i hapim se janë ta hapura, por kemi kërkuar të dalin në dritën e diellit dhe t’i komandojë shteti. Nuk janë mbyllur asnjëherë. Ata që i kanë pasur tani nuk paguajnë asnjë taksë, asnjë të punësuar as dihet nga vijnë e shkojnë këto para, para e zezë, e drogës, e krimit, e kontrabandës”.
Ylli i druhet ndryshimeve të ligjit për lojërat e fatit në komision dhe në seancë, ndërsa u shpreh se po u taksuan lojtarët të gjithë shkojnë tek e zeza. Ai shprehu kënaqësinë që këto para nuk do të shkojnë më në buxhetin e shtetit.
“Shteti është një e keqe e domosdoshme, çdo biznes qoftë dhe intelektual kur gjen hapësira të tilla mundohet të përfitojë sa më shumë. Më në fund pas një presioni të madh, pas 8 muajsh kryeministri arriti të presë të gjithë elitën e sportit. Ne këtë kërkojmë, ne qeverinë e kemi sponsorizues të sportit. Në çdo vend të botës pa mbështetjen e qeverisë nuk ka sport. Qeveria bën ligje të mira në parlament dhe ne duam si partnerë qeverinë që të na dëgjojë. Ne nuk jemi të kënaqur deri në fund se mund të bëhen ndryshime javën tjetër në komision por edhe në seancë. Me argumenta do i shpjegonim qeverisë po i taksove lojtarët do të shkojë të gjithë tek e zeza se asnjë vend i botës nuk i takson. Ne jemi të kënaqur që këto para nuk do të shkojnë më në buxhetin e shtetit. 0.4% shkon në llogarinë e Ministrinë së Kulturës e Sporteve çdo datë 10. Sporti mori 0 lekë, se këto qeveria i fuste në buxhet për mbyllur vrima të tjera”.
/a.r
