Ligji i Dhomave të Tregtisë do të jetë të martën për shqyrtim në rendin e ditës në komisionet Parlamentare, por burime të besuara bënë të ditura për ATSH-në, se ligji nuk do të miratohet, por do të rikthehet për shqyrtim nga e para.
Disa shoqata biznesi e kanë kundërshtuar miratimin e këtij ligji. Pika më e kundërshtuar është anëtarësimi me detyrim dhe pagesë pranë dhomave ne nivel qarku.
Por ministria e Ekonomisë e ka argumentuar vendosjen e anëtarësisë së detyrueshme të subjekteve tregtare në dhomën e tregtisë me faktin se rritja e të ardhurave do t’u mundësojë dhomave dhe bashkimit të dhomave të përmbushin detyrimet që rrjedhin, jo vetëm nga marrëveshjet ndërkombëtare me organizmat si EuroChambers, Association of Ballkan Chambers etj, por të zhvillojnë një aktivitet normal në ofrimin e shërbimeve në funksion të detyrimeve ligjore kundrejt anëtarëve të saj.
Pavarësisht qëndrimit të një grupi të shoqatave të biznesit Kuvendi e miratoi atë në seancën plenare të datës 29 shtator 2016. Por Presidenti i Republikës në atë kohë, Bujar Nishani e ka kthyer për rishqyrtim në Kuvend ligjin për Dhomat e Tregtisë dhe Industrisë./a.m.
