Ai është ndër aktorët më të dashur të humorit shqiptar, i njohur jo vetëm për rolet e batutat, por mbi të gjitha për origjinalitetin, veçantinë e natyrshmërinë me të cilën ka interpretuar secilin rol. Megjithatë, Sejfulla Myftari, ose Cekja i Beratit, prej kohësh nuk është në ekranet shqiptare.
I pëlqyer nga të rritur e fëmijë, ai ka arritur të ketë sukses në skenën shqiptare e ta mbajë suksesin duke i rezistuar viteve e ndryshimeve që ato sjellin.
Së shpejti, Cekja do të befasojë publikun me surprizën e radhës. Menjëherë me ardhjen e sezonit të vjeshtës, ai do të marrë pjesë në show-n televiziv “Dance with me” të producentes Vera Grabocka. Vendimi për të pranuar ofertën e Grabockës ka qenë tepër i vështirë, pasi për artistin liria dhe mungesa e angazhimeve janë thelbësore.
“Unë gjithmonë kam preferuar të jem elektron i lirë e jo i lidhur. Më ka pëlqyer të bëj punët e mia, të jem pranë publikut në koncerte, gëzime, evente. Madje, gjithmonë e kam konsideruar për një artist rrogën e shtetit si zinxhiri i qenit. Por Vera më imponoi me këmbënguljen e saj e me forcën artistike për të marrë përgjigjen PO për gjithçka që merr përsipër”, tregon Cekja.
Një tjetër projekt në të ardhmen e afërt është edhe një program televiziv në TVSH, i paraqitur nga vetë artisti. Cekja zbulon se formati i ri do të jetë i ndarë në 12 puntata, nga 30 minuta secila dhe do të ketë filma nga 12-13 minuta, si dhe intervista të zhvilluara nga Cekja me secilin aktor. Cekja premton një përmbajtje argëtuese dhe titull tepër interesant, të cilin dëshiron ta lërë surprizë.
