Deputeti i Partisë Socialiste Koço Kokëdhima në seancën e sotme parlamentare ku po diskutohet marrëveshja me Shtetet e Bashkuara të Amerikës për kontrollin e lëndëve narkotike, i është rikthyer sërisht idesë së tij për të legalizuar kanabisin.
Përsa i përket legalizimit të kanabisit medikal, deputeti theksoi se ideja e tij përkon me ndërtimin e një ekonomie të kanabisit nën kontrollin e plotë të shtetit, për vlera jashtëzakonisht të spikatura që kanabisi medikal ka.
“Unë e kam përshëndetur me vetëdije të plotë Policinë e Shtetit për të gjithë luftën e pakompromistë ndaj ekonomisë kriminale të kultivimit dhe trafikimit të lëndëve narkotike në Shqipëri. E kam përshëndetur të gjithë këtë punë të madhe që u bë nga qeveria jonë për të reduktuar këtë ekonomi kriminale. Asnjëherë nuk i kam ftuar shqiptarët të sfidojnë ligjin, asnjëherë as nuk e kam bërë dhe as do ta bëj, as për çështjet e kanabisit e as për një çështje tjetër. Njërëzit që implikohen në shkeljen e ligjit, mbeten humbës. Shkelësit e ligjit nuk mund të përfitojnë dhe shkelja e ligjit nuk i shërben shoqërisë. Unë s’kam folur jo për atë ekonomi kriminale që lulëzoi në kohën e Sali Berishës, nuk kam folur për parajsën e trafikantëve dhe as për të shkuarën e kultivimit legal të marijuanës në Shqipëri. Unë kam folur për të ardhmen, dhe kam folur për ekonominë e shtetit, kam folur për ndërtimin e ekonomisë nën kontrollin e plotë të shtetit dhe monopolin e shtetit mbi ekonominë e kanabisit. Sot në të gjithë botën dhe në të gjitha vendet e qytetet demokratike, është i përhapur debati për vlerat jashtëzakonisht të spikatura që ka kanabisi dhe për legalizimin kanabisit medikal. Për këtë kam folur për kanabisin medikal, industrinë farmaceutike të kanabisit, që i ndihmon njerëzit”, theksoi deputeti socialist.
Kokëdhima tha se e kanë legalizu Izraeli, Franca, Suedia, Danimarka etj. Sipas tij deputetët nuk duhet të kenë hezitim të diskutojnë për të drejtat e mijëra dhe dhjetëra mijëra pacientëve shqiptarë për t’u trajtuar me ilaçet e domosdoshme për sëmundjet e tyre.
