Kreu i grupit parlamentar të PD-së, Edi Paloka ka qenë i pari i cili ka folur në fillimin e seancës plenare, duke kërkuar nga kreu i kuvendit Meta, që të fusë në kalendarin e sotëm, kërkesën e opozitës për referendum popullor, në lidhje me importin e mbetjeve. Paloka ka kërkuar që kërkesa e PD të futet sot dhe të votohet po sot nga parlamenti.
Pyetja që do duhet t’i drejtohet qytetarëve në këtë referendum sipas PD-së është:
“A duhet të lejohet importi i mbetjeve në territorin e Shqipërisë”
“Sic ju njoftova, PD ka paraqitur një kërkse e cila është depozituar sot në administratën e kuvendit, për zhvillimin e një referendumi të përgjithshëm. Kërkesa e grupit tonë është që, kjo kërkesë për referendum të futet sot dhe të votohet po sot në këtë seancë. Të nderuar zoti Kryetar i kuvendit, grupi parlamentar i PD vlerëson se importi i mbetjeve cënon interesin publik, krijon premisë të qartë të importimit të mbetjeve nga grupe kriminale.”– tha Paloka.
Por nuk ka vonuar replika e kreut të grupit parlamentar të PS Gramoz Ruçi, i cili i është drejtuar opozitës, duke thënë se ligji i miratuar nuk ka të bëjë fare me mbetjet, por me importimin e një lënde të parë për një industri në nevojë. Ruçi theksoi se ligji e përmirëson mjedisin, sepse nuk lejon importin e mbetjeve të rrezikshme, ndryshe nga ligji që kërkonte të miratonte qeveria Berisha.
Ai ironizoi me opozitën kur tha se e ka mendjen te ligji që hartoi vet 4 vite më parë që sillte plehrat dhe mbetjet e rrezikshme në Shqipëri.
“Është e drejta juaj ta bëni opozitën siç e mendoni dhe siç doni. Flisni për plehrat kur s’ka kaluar asnjë ligj prë plehrat. Ka kaluar një ligj për lëndë të parë, për një industri të caktuar. Flisni për lëndë për djegie e groposje, kur ligji nuk lejon lëndë për djegie e groposje por vetëm për riciklim. Flisni për dy gjëra të ndryshme.
U ka ngelur mendja te ligji juaj. Jo, ai ligj është groposur si lëndët e rrezikshme. Ligji ndalon rreptësisht lëndët e rrezikshme, dhe përcakton se çfarë lënde parë futet në Shqipëri”, tha Ruçi./java/a.k/a.m
