Gjykata suedeze njoftoi sot rihapjen e hetimit me akuzën për përdhunim kundër themeluesit të WikiLeaks Julian Assange, me shpresën për t’a nxjerrë para drejtësisë përpara pushimit të çështjes në 2020, nëse nuk ekstradohet deri atëherë drejt SHBA-së.
Njoftimi i prokurorisë së Stokholmit rinis kalvarin ligjor i cili vazhdon prej gati një dekade. Gjatë kësaj periudhe Julian Assange dhe mbështetësit e tij nuk kanë reshtur së denoncuari atë si një strategji për ta ekstraduar drejt SHBA-së për t’u përgjigjur për publikimin nga ”WikiLeaks’’ të dokumenteve sekrete amerikane.
Për të shmangur në mënyrë zyrtare ekstradimin, australiani u strehua në 2012 në ambasadën e Ekuadorit në Londër. Në mungesë të tij dhe pamundësisë për vijimin e hetimit, gjykata suedeze i pezulloi hetimet në maj 2017.
Arrestimi i tij i bujshëm më 11 prill në Londër ringjalli shpresën e akuzueses dhe avokatit të saj për ta rihapur procesin gjyqësor në Suedi përpara skadimit të afatit në gusht të 2020.
/a.rada
