Njësia hetimore Task-Forcë pranë prokurorisë së Tiranës ka rihapur dosjen penale për pastrim parash ndaj Dhimitër Potit, hetim ky i pezulluar në vitin 2012 dhe në 2015 nga kjo prokurori.
Shkak i këtij pezullimi është bërë mos ardhja e një përgjigje me letërporosi nga autoritet e drejtësisë Greke. Mirëpo tashmë kur Dhimitër Poti është arrestuar në Belgjikë së bashku me vëllanë e tij Xhevahir Poti si drejtues të një organizate kriminale që trafikonte drogë për llogari të “Eskobarit të Ballkanit” Kelmend Balili, drejtoria e pastrimit të parave ka referuar material hetimor në prokurori, duke bërë që kjo e fundit të rihapë sërisht dosjen e pastrimit të parave për Dhimitër Potin.
Administratori i kompanisë së ilaçeve “Chim Prod” Dhimitër Poti mendohet si njeriu që ka pastruar një shumë financiare prej 826 mijë euro, duke e transferuar atë nga Greqia në drejtim të Shqipëri dhe në dy raste ka bërë dy transfertë 100 e 266 mijë euro nga Shqipëria në drejtim të shtetit helen. E gjithë kjo shumë financiare është bërë në pesë transferta bankare të cilat, aktualisht janë kthyer në vëmëndjen kryesore të prokurorisë së Tiranës dhe prokurorisë Greke.
Këto të fundit në muajin tetor 2015 kanë dërguar në shqipëri një letërporosi duke kërkuar informacion të detajuar lidhur me veprimtarinë e biznesmenit Dhimitër Poti.Pala greke, interesohet për veprimtarinë tregtare të Potit dhe nëse ai ka pasur bashkëpuntorë grekë në këtë çështje.
Hapja e kompanisë “Chim-Prod”
Në muajin nëntor “Shqiptarja.com” mëson se biznesmeni Dhimitër Poti, që tashmë po hetohet nga dy shtete për pastrim parash e trafik droge, rezulton të ketë hapur në 31 mars 2008 kompaninë “Chim Prod”,e cila ka pasur aktivitetin e saj tregtar në Import-Eksportin, tregti me shumicë e pakicë e artikujve të ndryshëm, mjeteve motorike dhe barnave farmaceutikë. Pikërisht në këtë kompani biznesmeni Poti, është aksioner me 100 për qind të aksioneve.
Mirëpo pas dy viteve aktivitet kjo kompani, ka mbyllur veprimtrainë e saj me një vendim të pronarit Dhimitër Poti, i cili në 13 prill 2010 ka urdhëruar likujdimin e kompanisë dhe për pasojë ka emëruar dhe eksperten kontabël Semiha Dollani.Momentalisht kompania “Chim Prod” rezulton e mbyllur.
Ndërkohë për sa i përket transfertave të dyshimta, gazeta “Shqiptarja.com” mëson se ato janë kryer gjatë periudhës 2007 deri në 2009, ku në total janë lëvizur 826 mijë euro. Më konkretisht në datën 3 gusht 2007, shuma 160.000 euro, kreditim për llogari personale të Dhimitër Poti në Shqipëri nga Greqia. Në datën 31 dhjetor 2008, shuma 80.000 euro, kreditim për llogari personale të Dhimitër Poti në Shqipëri nga Greqia.
Në datën 2 prill 2009, shuma 220.000 euro, kreditim për llogari personale të Dhimitër Poti në Shqipëri nga Greqia. Në datën 19 shkurt 2009, shuma 266.000 euro, Dhimitër Poti nga Shqipëria për në Greqi. Dhe në datën 1 shtator 2009, shuma 100.000 euro, Dhimitër Poti nga Shqipëria për në Greqi. Të gjitha këto transaksione dyshohet se janë kryer për të pastruar këto,para për të cilat tashmë edhe shteti grek edhe shteti shqiptar kanë nisur hetimet. a.k
