23 vite pasi drejtësia foli me vendim të formës së prerë mbi masakrën e Urës Vajgurore në të cilën u vranë katër efektivë policie dhe u plagosën dy të tjerë, Gjykata e Lartë ktheu në gjykatë dosjen e 1997-ës.
Por nga nëntë të dënuar të përjetshëm vetëm njëri prej tyre do të rigjykohet pranë Gjykatës së Posaçme Antikorrupsion dhe kundër Krimit të Organizuar.
Si një nga anëtarët e bandës së 1997-ës, Fran Marashi i dënuar i përjetshëm që e ka marrë këtë verdikt në mungesë, do të përballet me gjyqtarët e posaçëm për akuzat e vrasjes së punonjësve të policisë rrëmbim personi dhe krime nga banda e armatosur, raporton Top Channel.
Nga ky gjykim u provua se tre anëtarët e familjes Protoduari, që ishin banues në Urën Vajgurore gjatë 1997 u armatosën me armë të kalibrave të ndryshëm. Për shkak të njohjeve familje u organizua me të akuzuarin Marashi nga Oblika e Shkodrës si dhe disa tjetër nga kjo zonë, dy prej të cilëve nuk jetojnë më.
Të dyshuarit në formës e bandës nisën grabitjet, në qershor rrëmbyen një shtetas i cili u shpëtua me ndërhyrjen e një shefi policie. Por ngjarja më e rëndë që njihet si masakra e Urës Vajgurore ndodhi në 17 qershor të këtij viti kur pas një mitingu elektoral, teksa forcat e policisë po ktheheshin në Berat, me automjete të blinduara ata u sulmuan me armë dhe predhë antitank.
Njëri nga dëshmitarët e asaj kohe i tha gjykatës se mbi blindin e policisë u hodhën lëndë djegëse dhe midis të dyshuarve ai identifikoi edhe Fran Marashin. Në blind gjetën vdekjen e menjëhershme policët Miltiadh Koçi, Arjan Shemuni, Asllan Selami e Ilia Bano dhe u plagosën dy policët Thimi Tanku e Ylli Dhamo.
Fran Marashi iu dorëzua Shqipërisë nga drejtësia italiane në vitin 2006 dhe gjatë kësaj kohe ka kërkuar për vite me radhë rigjykim, ndërkohë që u kthye në protagonist në të një arratisjeje të dështuar pak kohë më parë.
Gjykata e Lartë sjell në vëmendje edhe një vendim të Gjykatës Kushtetuese në këtë dosje mbi procedurat e gjykimit për familjen Protoduari mbi të drejtën për t’u dëgjuar dhe mbrojtur.
Në Gjykatën e Lartë akuza e shtetit u përfaqësua nga prokurorja e SPAK, Doloresa Musabelliu e cila me shumë mundësi do ta përfaqësojë gjykimin edhe në themel./m.j
