Antonio Rigozzi, avokati zviceran i specializuar për çështjet sportive në studion ligjore Lévy Kaufmann-Kohler, ka refuzuar kërkesën e Skënderbeut për ta mbrojtur para UEFA-s për akuzat e trukimeve. Lajmi është zbuluar nga Panorama Sport, e cila shkruan se avokati e ka përligjur refuzimin me faktin që ai nuk është i specializuar në këtë fushë, pra për trukimin e ndeshjeve.
Rigozzi është njeriu që përfaqësoi Shqipërinë kundër dënimit nga UEFA, pas ngjarjeve të 14 tetorit 2014 në Beograd.
Në Komisionin e Apelit në UEFA, Rigozzi kapi mat gjyqtarin anglez Atkinson, duke e detyruar të pranonte se nuk i kishte kërkuar kurrë zyrtarisht kombëtares shqiptare të dilte në fushë pas dhunës dhe se nuk kishte informacion e raport zyrtar me shkrim nga oficeri i sigurisë se si ishte gjendja në shkallët e stadiumit Partizan në Beograd gjatë kohës që skuadrat ishin në dhomat e zhveshjeve.
Ky detaj i rëndësishëm nuk u mor parasysh nga Apeli i UEFA-s, por ai ishte baza mbi të cilin u ndërtua dhe u fitua çështja në Gjykatën e Arbitrazhit Sportiv në Lozanë (CAS), ku Shqipëria mori tri pikët në tavolinë.
FSHF e angazhoi zviceranin dhe studion që ai përfaqëson me pretendimin se ishin më të mirët në qarkullim dhe me këtë shpresë ka qenë edhe Skënderbeu, por klubit korçar do t’i duhet të gjejë tjetër “kampion” për ta mbrojtur para UEFA-s.
D.I.