Revista amerikane “Quartz” ka përfshirë Shqipërinë në listën e 10 destinacioneve më të mira për t’u vizituar në vitin 2026, duke veçuar veçanërisht Rivierën Shqiptare për bukuritë natyrore, çmimet më të përballueshme dhe faktin se ende nuk është përfshirë në të njëjtin nivel të turizmit masiv si destinacionet e tjera të Mesdheut.
Ajo e thekson vendin si një nga surprizat më të mëdha turistike të Evropës. Ajo përmend vijën bregdetare, malet dhe kostot e ulëta.
Në artikull, Shqipëria renditet krahas disa destinacioneve të tjera në botë që, sipas “Quartz”, ofrojnë përvoja të veçanta turistike, përpara rritjes së mëtejshme të turizmit, çmimeve dhe flukseve të vizitorëve.
Këto 10 destinacione janë zgjedhur sepse ofrojnë bukuri natyrore dhe pasuri kulturore, përpara se numri i turistëve të rritet dhe çmimet të shtrenjtohen, duke sjellë më shumë turma vizitorësh dhe radhë të gjata.
Bregdeti i Shqipërisë ofron pamje të Adriatikut me çmime shumë më të ulëta se Amalfi
Riviera Shqiptare shtrihet përgjatë bregdetit, nga Vlora në jug deri në Sarandë.
Ajo veçohet për ujërat e kaltra, plazhet dhe malet që shtrihen pranë deteve Adriatikut dhe Jonit, duke krijuar një peizazh tërheqës për turistët.
Çmimet janë shumë më të ulëta krahasuar me Italinë, Kroacinë apo Greqinë.
Qytete dhe zona bregdetare si Dhërmiu, Himara dhe Ksamili ndodhen përballë ishullit të Korfuzit.
Afërsia me Greqinë ka bërë që turistët grekë të udhëtojnë edhe për një ditë në Shqipëri, ku gjejnë ushqime me çmime më të ulëta dhe plazhe më pak të frekuentuara.
Shqipëria për dekada me radhë, qëndroi e izoluar për shkak të regjimit komunist, i cili kufizonte ndjeshëm kontaktet me botën e jashtme.
Ky izolim përfundoi në fillim të viteve 1990.
Megjithatë, zhvillimi i madh i resorteve turistike, që u përhap në pjesën tjetër të Mesdheut, nuk arriti në të njëjtën masë në Shqipëri.
Tre dekada më vonë, përgjatë bregdetit shqiptar ka ende më pak hotele shumëkatëshe.
Shërbimet në plazhe ofrohen me çmime më të ulëta, përfshirë shezlongët dhe çadrat, krahasuar me zonat turistike në anën tjetër të detit.
Vendi ofron dy qytete të përfshira në listën e Trashëgimisë Botërore të UNESCO-s, të cilat mund të jenë ndër ndalesat kryesore të një udhëtimi në Shqipëri.
Gjirokastra njihet si “qyteti i gurtë”, për shkak të shtëpive karakteristike të periudhës osmane, me çati prej pllakash guri, të ndërtuara përgjatë shpatit të kodrës.
Pazari dhe Kalaja që ndodhet në pjesën e sipërme të qytetit, dëshmojnë historinë e tij shumë shekullore.
Berati, i njohur si “qyteti i një mbi një dritareve”, karakterizohet nga shtëpitë e bardha të periudhës osmane, të vendosura në shpatet përgjatë lumit.
Sipas artikullit, pak vende në Ballkanin jugor ofrojnë pamje kaq tërheqëse për fotografi.
Edhe Tirana, kryeqyteti i Shqipërisë, po përjeton një zhvillim të ri.
Ndërtesat e apartamenteve, të cilat dikur kishin një pamje të zymtë, janë rikonstruktuar dhe lyer me ngjyra të ndryshme.
Kjo është pjesë e një përpjekjeje më të gjerë për ta zhvilluar Tiranën, si një qytet modern dhe të orientuar drejt dizajnit, dhe jo vetëm si një pikë tranziti për turistët.
Ndërkohë, fluturimet direkte nga disa prej qendrave kryesore evropiane, janë shtuar vazhdimisht.
Kjo ka reduktuar kohën e udhëtimit dhe e ka bërë Shqipërinë më të aksesueshme për turistët evropianë.
Një nga arsyet kryesore për të vizituar Shqipërinë është kostoja më e ulët e udhëtimit.
Sipas artikullit, një vakt, një dhomë hoteli dhe një makinë me qira në Shqipëri, zakonisht kushtojnë dukshëm më pak sesa një udhëtim i ngjashëm në bregdetin dalmat të Kroacisë gjatë sezonit të verës.
Në të njëjtën kohë, Shqipëria vijon negociatat për anëtarësimin në Bashkimin Evropian dhe po rrit investimet në infrastrukturë.
Artikulli vlerëson se diferenca aktuale e çmimeve me destinacionet e tjera mesdhetare mund të mos zgjasë përgjithmonë.
Destinacionet e tjera të renditura në listën e medias amerikane “Quartz” janë; Uzbekistani, Butani, Kosta Rika, Japonia, Sllovenia, Sri Lanka, Ishujt Faroe, Pulja në Itali dhe Armenia.
