Reklamat mund t’i kenë ndihmuar Iranit dhe aleatëve të tij të përcaktonin më saktë objektivat ndaj forcave amerikane të dislokuara në rajon.
Këtë e bëjnë të ditur burime ushtarake amerikane të cituara nga Reuters, sipas të cilave janë çaktivizuar gjurmuesit e reklamave në telefona dhe kompjuterë, pasi u zbulua se të dhënat e gjeolokalizimit të disponueshme në treg po përdoreshin për të identifikuar vendndodhjen e trupave.
Forcat Ajrore amerikane i kanë bërë të ditur senatorit Ron Wyden, i cili kishte ngritur shqetësimin për këtë çështje, se identifikuesit e reklamave në kompjuterë dhe telefona celularë ishin çaktivizuar dy muaj më parë.
Komanda e Operacioneve Speciale deklaroi se kishte ndërmarrë të njëjtën masë “së fundmi” në pajisjet e saj me sistem Windows. Ndërkohë, Ushtria amerikane i tha Reuters se ID-të e reklamave të lidhura me pajisjet celulare ishin çaktivizuar që në fillim të këtij viti.
Wyden, senator demokrat nga Oregon, i kishte kërkuar Pentagonit prej muajsh të trajtonte këtë problem.
Këto zbulime nxjerrin në pah një shqetësim në rritje për sigurinë kombëtare: mundësinë që të dhënat e gjeolokalizimit të mbledhura nga industria e reklamave dhe të shitura nga të ashtuquajturit “data broker”, kompani që grumbullojnë dhe rishesin të dhëna personale, të përdoren për të gjurmuar dhe shënjestruar personelin ushtarak të dislokuar në zona lufte.
