Ndërkohë që fuqitë botërore dhe Irani vazhdojnë negociatat bërthamore në Vjenë, shumë vëzhgues janë optimistë se së shpejti mund të arrihet një marrëveshje. Por politikanët e vijës së ashpër nga të dyja palët kanë intensifikuar retorikën kundër arritjes së një marrëveshjeje. Megjithëse marrëveshja mund të jetë e vështirë, analistët thonë se idetë e vjetra thjesht nuk janë më një faktor praktik i negociatave.
Ndërsa në Vjenë vazhdojnë bisedimet kritikët po intensifikojnë aktivitetin e tyre në internet, duke akuzuar diplomatët amerikanë dhe iranianë për bisedime me armikun.
“Ata thonë të njëjtën gjë, si në Teheran ashtu edhe në Uashington. Kritikët thonë se “ekipi negociator po bën shumë lëshime dhe po bien dakord për çdo gjë. Kjo do të jetë një fatkeqësi, gjëja më e keqe që ka ndodhur ndonjëherë”.
Ai thotë se ka kritika edhe nga mbështetësit e rivalëve të Iranit të cilët kanë frikë se vendi do të fuqizohet nga kjo. Por sipas analistëve, disa politikanë të vijës së ashpër kanë pikëpamje të vjetra mbi marrëdhëniet ndërkombëtare, thotë Yan St-Pierre, drejtues i firmës së sigurisë, MOSECON me qendër në Berlin.
“Argumenti i tyre është i bazuar në përshtypjen e tyre të Iranit dhe Shteteve të Bashkuara nga vitet 1980 dhe 1990 kur ato ishin kundërshtarë ideologjik. Kjo pikëpamje nuk është konstruktive dhe nuk është e përshtatshme me kontekstin e vitit 2015”.
Ai thotë se në sistemin e sotëm të marrëdhënieve ndërkombëtare, të ashtuquajturit “armiq” duhet të punojnë së bashku.
Për shembull, Shtetet e Bashkuara dhe Irani po luftojnë kundër Shtetit Islamik në Irak, por mbështesin palët kundërshtare në Siri dhe Jemen.
Zoti Parsi thotë se çështja e inspektimeve ndërkombëtare të objekteve bërthamore të Iranit do të jetë një proces i shqyrtuar me kujdes në vend të një qasjeje të papenguar që duan disa politikanë. Çështja tjetër e debatit është afati kohor për lehtësimin e sanksioneve, që Irani dëshiron të ndodhë menjëherë.
“Sanksionet në kombinim me paaftësinë dhe keqmenaxhimin e qeverisë iraniane kanë patur një ndikim të madh mbi jetën e qytetarëve iranianë”.
Që kur Kombet e Bashkuara urdhëruan Iranin të pezullojë aktivitetet bërthamore në vitin 2006, sanksionet ndërkombëtare kanë ngrirë asetet dhe kanë kufizuar tregtinë.
Zoti Parsi thotë se puna për të bindur kritikët se marrëveshja do t’i bëjë të gjithë më të sigurt, nuk do të fillojë para se të arrihet një marrëveshje.
“Këto negociata janë zhvilluar për një kohë të gjatë. Shumica e pyetjeve kanë të bëjnë me çështjet teknike të negociatave”.
Ai thotë se marrëdhëniet ndërkombëtare ndryshojnë në mënyrë dramatike pasi një vend mposhtet ushtarakisht, por këto bisedime mund të jenë një mundësi për të parandaluar shndërrimin e këtij konflikti në luftë. VOA
