Situata në qytetin e Shkodrës pas reshjeve të dendura lokale të rëna mesditën e sotme të cilat shkaktuan edhe përmbytje, tashmë është normalizuar.
Prefekti i Shkodrës, Çesk Millja gjatë një interviste për Agjencinë Telegrafike Shqiptare (ATSH), sqaron se situata në këtë qytet pas reshjeve është normalizuar dhe se institucionet e linjës janë në gatishmëri për çdo lloj rasti.
“Në përballimin e kësaj emergjence u angazhuan të gjitha strukturat. Shira të tillë ndodhin dhe janë të paparashikueshëm, i vetmi problem që patëm ishte te spitali, ku së bashku me forcat e zjarrfikëses morëm masat menjëherë duke zgjidhur problemin. Në këto momente çdo gjë është normalizuar. Shansi për qytetin e Shkodrës ishte që shiu edhe pse ishte i dendur duke rënë në formë breshëri, nuk u shoqërua nga erëra të forta ashtu si në disa qarqe të tjera të vendit, duke na lehtësuar mjaft punën”, – theksoi prefekti Millja.
Në fjalën e tij prefekti u ndal edhe tek efektet pozitive qe pati rënia e këtij shiu. Edhe pse me një dozë tepër të lartë, shiu i rënë në Shkodër i ka dhënë një ndihmë fermerëve të këtij qarku si dhe në mbrojtjen ndaj zjarreve, të cilat shpeshherë shkaktohen nga temperaturat e larta që përfshijnë vendin tonë.
“Për bujqësinë mund të them që ka qenë një gjë e mirë, ashtu edhe për parandalimin e zjarreve. Gatishmëria ka qenë në nivelet e duhura e institucionit të prefektit me forcat e ushtrisë. Jemi në gatishmëri për të përballuar çfarëdolloj situate nëse do të ketë një të tillë, do të jenë forcat e zjarrfikëses, të ushtrisë dhe të gjitha institucioneve të linjës. I pyetur nëse reshjet e shiut të cilat shkaktuan përmbytje të vogla në Shkodër kanë shkaktuar dëme ekonomike në këtë qark, prefekti Millja theksoi se deri tani në këtë zonë nuk është konstatuar një gjë e tillë. /b.d
