Pjesë të Azisë Juglindore po përballen me përmbytje të paprecedenta, teksa një stuhi e fuqishme ka goditur rëndë jugun e Tajlandës, Vietnamit dhe Malajzisë.
Qyteti Hat Yai në Tajlandë ka regjistruar 335 mm shi brenda një dite, reshjet më të mëdha të 300 viteve të fundit, duke e kthyer zonën në një liqen gjigant. Mijëra shtëpi dhe automjete janë nën ujë, ndërsa banorët presin shpëtim në çatitë e banesave.
Të paktën 33 persona kanë humbur jetën vetëm në Tajlandë, ndërsa mbi 2 milionë banorë janë prekur nga përmbytjet. Vetëm 13 mijë janë strehuar në qendra emergjence, ndërsa pjesa tjetër vijon të jetë e izoluar. Ushtria tajlandeze ka vënë në gatishmëri një aeroplanmbajtëse, flotilje prej 14 anijesh dhe helikopterë për të shpërndarë ushqime e ndihma, ndërsa mjekët janë gati të kthejnë anijen në “spital lundrues”, shkruan A2 CNN.
Në Malajzi, mbi 19 mijë persona janë evakuuar, ndërsa ekipet e shpëtimit po punojnë pa ndërprerje në zonat më të goditura.
