Sasia e lartë e reshjeve gjatë muajit janar ka përmirësuar ndjeshëm situatën hidroenergjetike në HEC-et e kaskadës së Drinit. Sipas të dhënave të KESH Rezerva energjetike është shtuar me rreth 422 GWh krahasuar me fundvitin e 2015-ës.
Niveli i HEC Fierzës është rreth 12.7 metra më lartë se niveli më datën 31 dhjetor 2015. Nëse kjo rezervë do të konvertohej me çmimet e bursës së Hungarisë, të cilat merren si referencë nga KESH dhe OSSHE për eksportin dhe importin energjisë, atëherë vlera e vlerës se rezervës së krijuar arrin në mbi 22 milionë euro.
Nga të dhënat e Sektorit të Operimit dhe Monitorimit të kaskadës në KESH, rezulton deri ne mesditën e djeshme niveli i HEC Fierzë ishte 288.60 m dhe prurjet ishin rreth 350 m3/sek. Niveli në HEC Koman ishte 173.70 m dhe prurjet anësore janë rreth 160 m3/sek dhe niveli në HEC Vau i Dejës ishte 74.50 m dhe prurjet anësore rreth 20 m3/sek.
Në fund të nëntorit 2015 niveli i basenit të Fierzës ishte 277.85. Ndërkohë, KESH arriti dakordësinë me tregtarët e energjisë që të ndërpresin, pa kosto për KESH-in, furnizimin e energjisë nga importi i kontraktuar më parë për javën e fundit të nëntorit 2015.
Ndërkaq, duke parë nivelet e ujit në Kaskadë, kërkesën e konsumatorëve tarifore dhe parashikimet e situatës hidrometeorologjike për muajin dhjetor 2015, KESH reduktoi me rreth 2 milion euro shpenzimet për importin e dhjetorit 2015 dhe fondet e kursyera falë reshjeve të shiut, tanimë do mund ti shërbejnë KESH-it për të përmirësuar bilancin e vet financiar./Monitor
