Reshjet e dendura të shiut që kanë përfshirë rajonin e Lezhës që prej mesnatës së kaluar kanë shkaktuar probleme në furnizimin me energji elektrike dhe në lëvizjen detare.
Sipas të dhënave nga terreni, shumë fshatra në zonën e Zadrimës, si dhe në njësitë administrative Kolsh dhe Zejmen, kanë mbetur pa energji elektrike për shkak të defekteve të shkaktuara në rrjet nga moti i keq. Grupet e punës së Operatorit të Shpërndarjes së Energjisë Elektrike (OSHEE) ndodhen në terren dhe po punojnë për rikthimin e energjisë në zonat e prekura.
Ndërkohë, në brigjet e Shëngjinit është regjistruar dallgëzim i lartë, duke e bërë të rrezikshme lundrimin me mjete të vogla. Autoritetet u kanë bërë thirrje drejtuesve të mjeteve të peshkimit që të tregojnë kujdes dhe të shmangin daljet në det deri në përmirësimin e kushteve atmosferike.
Strukturat e emergjencave civile në tre bashkitë e Qarkut të Lezhës janë vendosur në gatishmëri për t’i paraprirë çdo situate që mund të krijohet.
Nga komunikimi me strukturat vendore, Prefekti i Qarkut Shkodër ka bërë me dije se në bashkitë Shkodër, Malësi e Madhe dhe Vau Dejës ka pasur reshje me intensitet të lartë gjatë mbrëmjes, ndërsa në bashkinë Fushë Arrëz reshjet vijojnë me intensitet mesatar. Deri më tani, nuk janë raportuar problematika apo situata emergjente.
Situata në Qarkun Kukës paraqitet e qetë. Të gjitha akset rrugore nacionale janë të qarkullueshme normalisht dhe nuk janë raportuar problematika emergjente nga bashkitë Kukës, Tropojë dhe Has.
I gjithë qarku furnizohet me energji elektrike, me përjashtim të njësive administrative Zapod, Topojan dhe Shishtavec në bashkinë Kukës, ku grupet e punës po punojnë për rikthimin e furnizimit.
