Kryeqyteti është përfshirë nga reshjet e shiut prej orëve të para të mëngjesit. Intensiteti i lartë i tyre ka krijuar prezencë të madhe të ujit në disa rrugë dhe probleme në qarkullim.
Probleme të shumta janë shfaqur në zonën e ish Parkut të Autobuzave, zona e Pallatit me Shigjeta, zona “Don Bosko”, në Kombinat e shumë zona të tjera. Reshjet e shumta kanë krijuar po ashtu një trafik të rënduar kyesisht në zonën e “Vasil Shanto” dhe qendër.
Më herët, Kryetari i Bashkisë së Tiranës, Erion Veliaj u bëri thirrje qytetarëve që për çdo emergjencë të telefonojnë në numrin 112. Ndërkohë që 300 punonjës nga bashkia janë vënë në dispozicion të zonave me probleme.
Drejtori i Ndërmarrjes numër 2, Elton Kacidhja në një prononcim për median, tha se 300 punonjës të Bashkisë dhe disa ndërmarrjeve të saj janë shpërndarë në terren në mënyrë që të ndërhyjnë në pikat më me probleme.
“Situata është nën kontroll të plotë. Ka disa probleme në zonën tek Pallati me Shigjeta, Komuna e Parisit dhe Don Bosko. Deri tani nuk ka ndonjë emergjencë megjithatë ne jemi duke monitoruar situatën sidomos në zonat ku jetojnë anëtarë të komunitetit rom”, tha ai. (java / r.a)
