Nisur nga moti i keq në të gjithë vendin, me reshje shiu dhe dëbore, Policia e Shtetit apelon të gjithë drejtuesit e mjeteve që të bëjnë kujdes.
Në një njoftim, Policia kërkon nga drejtuesit e mjeteve që të moderojnë shpejtësinë, të mos kryejnë parakalime të gabuara, të vendosin zinxhir në akset rrugore ku ka prezencë të reshjeve të dëborës.
“Vendosni rripin e sigurimit, mos përdorni celularin gjatë drejtimit të automjetit dhe ndiqni udhëzimet e Policisë Rrugore dhe të autoriteteve të tjera shtetërore.
Mos qarkulloni pa kontrolluar gjendjen teknike të mjetit, gjendjen dhe presionin e gomave përpara së të qarkulloni në rrugë me shi; ulni në maksimum shpejtësinë në rrugët ku ka prezencë të shtuar të ujit apo të borës në rrugë, rrisni ndjeshëm distancën e sigurisë midis mjeteve, nga 20% në 80%; dhe shmangni frenimin ose lëkundjen papritmas, por ngadalësoni gradualisht”, thotë policia.
Policia Rrugore thotë se ka rritur prezencën e shërbimeve të saj në rrugë për ti ardhur në ndihmë çdo drejtuesi mjeti në nevojë./ h.b
