Erion Veliaj, kandidati i së majtës për kreun e Bashkisë Tiranë, është takuar paraditen e sotme me një grup artistësh dhe aktorësh.
Befasues ka qenë reagimi i Artistit të Popullit, Reshat Arbana, i cili ka reaguar duke parashtruar kërkesa si qytetar.
“E para: Më pëlqen platforma jote dhe ishalla u realizofshin 35- 40% nga ato që propozuat. Unë kam një gjë fare, fare të vockël: 25 vjet na thuhet se dyert tona janë të hapura ditë e natë e s’keni nevojë t’i thyeni. A do na e mbani derën hapur se 25 vjet kemi trokitur e nuk kemi hapur asnjë derë me të thënë të drejtën?
E dyta: Po ç’bëhet? A do bëhet një parkim i madh këtu në Tiranë. Kaq e vështirë qenka kjo punë o burrë i dheut?! Po të na bëjnë një ftesë ne të gjithëve të japim një mijë lekë dhe të bëjmë një parkim se po vriten njerëzit për një vend parkimi apo një gërvishtje makine.
Janë gjëra të vogla në dukje e duken sikur nuk kanë lidhje fare me artin, por kanë lidhje me kulturën e këtij kombi. Në realizofsh këto detyra, siç ke realizuar aty ku ke qenë, ashtu siç kemi dëgjuar, do jesh i nderuar dhe i reskeptuar. Na mbani dyert hapur” – tha Arbana.
