Republikanët mbyllën të enjten konventën e tyre në Dallas, me një fjalim të zëvendëspresidentit JD Vance dhe një thirrje të presidentit Trump për të votuar në zgjedhjet e mesmandatit në 3 nëntor.
Trump udhëhoqi anëtarët e Partisë Republikane në një betim simbolik për të votuar, pavarësisht nëse janë “të regjistruar apo jo”.
Ndërkohë zëvendëspresidenti JD Vance mori vëmendjen kryesore me një fjalim që shihet si një provë e hershme për perspektivat e tij për Shtëpinë e Bardhë në vitin 2028, sipas Reuters.
“Çdo amerikan, qoftë këtu prej 10 vitesh apo prej 10 minutash, e meriton trashëgiminë e shenjtë të Shteteve të Bashkuara të Amerikës. Zonja dhe zotërinj, këtë nëntor, le t’ua japim atë. Le të luftojmë për njerëzit tanë. Le t’i largojmë demokratët nga pushteti. Dhe le të mos harrojmë kurrë se Amerika u përket atyre që e duan, jo atyre që e urrejnë”, tha JD Vance.
“Reuters” raporton se shumë republikanë e shohin Vance-in si kandidatin kryesor për të çuar përpara lëvizjen “Make America Great Again”.
Disa në turmë brohoritnin “48, 48”, duke sugjeruar se Vance mund të bëhej presidenti i 48-të i vendit në vitin 2028, por numri dy i Shtëpisë së Bardhë tha se Republikanët fillimisht duhet të përqendrohen te fitimi i zgjedhjeve të ndërmjetme të nëntorit.
Trump ende nuk ka dhënë ndonjë sinjal se kë do të mbështeste në vitin 2028, megjithëse Republikanët spekulojnë shpesh nëse Vance apo Sekretari i Shtetit, Marco Rubio, janë në pozicionin më të mirë për të udhëhequr partinë pasi ai të largohet nga detyra.
