Analisti Arben Meçe komentoi zhvillimet e fundit politike në vend, me votimin për pjesëmarrjen ne Bordin e Paqes dhe ‘aksionet’ e fundit të SPAK. Sipas Meçes, ftesa për në Bordin e Paqes bëri që më të fituar të dilnin Rama dhe PS, ku opozita mbajti një qëndrim të detyruar.
Në analizën e tij, Meçe theksoi se perceptimi publik është se SPAK shihet si i orientuar politikisht dhe se duhet të marrë fund ‘Republika e Prokurorëve’. Sa i takon partive të reja, Meçe shprehet i prerë se ato kanë humbur funksionin dhe imazhin e tyre.
“Bordi i Paqes ka pasur një influencë në ambientin shqiptar. Ftesa që iu bë Ramës dhe procesi që u zhvillua sollën që PS të dilte më e fituar në kuptimin e debatit, jo domosdoshmërisht të fitores politike. Në këtë kuptim, është një fitore e Ramës dhe e PS-së. PD mbajti një qëndrim të detyruar, më shumë organizativ, por gjithsesi një qëndrim që është për t’u vlerësuar.
Prej kohësh, PS ka arritur pikën më të ulët të perceptimit në opinionin publik pas goditjeve të fundit të SPAK. Filloi të diskutohej një orientim politik i SPAK. U kuptua se SPAK, nga ana e tij, kishte prishur balancat që lidhen me goditjen direkte. Qytetari, që më parë kishte një perceptim të caktuar për korrupsionin, sot e sheh SPAK-un me sy tjetër. Disa zhvillime janë kthyer në shqetësim edhe për administratën e lartë shtetërore. “Republika e prokurorëve” duhet të fillojë të tërhiqet dhe të kuptohet se në Shqipëri nuk ka dhe nuk duhet të ketë një republikë prokurorësh.
Partitë e vogla e kanë humbur funksionin dhe imazhin e tyre. Në vend që të formonin një pol, vlera e tyre sot mbetet kryesisht mediatike.”
