Monedha e përbashkët ka shënuar një rënie të fortë në tregun vendas gjatë ditëve të fundit, duke zbritur dje në 139.11 lekë, niveli më i ulët në gati një vit, ndërsa në tregun e lirë këmbehet nën 139 lekë. Ndonëse euro ka shënuar rënie dhe në tregjet ndërkombëtare, zhvlerësimi i tij në tregun vendas është disi i pazakontë, pasi kursi i këmbimit të monedhës së përbashkët me lekun ka qenë “indiferent” gjatë gjithë vitit, duke u këmbyer në mbi 140 lekë.
Aktorët e tregut pohojnë se kërkesa për valutë në këtë periudhë nuk është e lartë, por nga ana tjetër ata citojnë një arsye tjetër që dobësoi papritur euron. Bankat e mëdha po mbajnë pozicione të hapura valutore (sipas ligjit të Bankës së Shqipërisë mund t’i mbajnë të tilla deri në një muaj) në përpjekje për të zhvlerësuar euron, për ta blerë më pas atë lirë, teksa synojnë të marrin pjesë në ankandin për blerjen e eurobondit prej 300 milionë eurosh që do të emetojë qeveria shqiptare brenda muajit tetor.
Bankierët në Shqipëri kanë pohuar se ata lejohen të blejnë deri në 30 milionë euro nga eurobondi që do të emetojë qeveria shqiptare dhe e shohin me interes si investim, çka ka bërë që të kërkojnë që të rritet limiti për pjesmarrje në 60 milionë euro. Edhe individët mund të blejnë, por vetëm përmes bankave, jo direkt.
Financat planifikojnë, që eurobondi i ri prej 300 milionë eurosh të emetohet deri në mes të tetorit. Ai do të zëvendësojë eurobondin 5 vjeçar prej 300 milionë eurosh, që maturohet në fillim të nëntorit të këtij viti.
Në 28 shtator, qeveria pritet të fillojë ‘road show’ me investitorët, në përpjekje për të gjetur blerës të mundshëm për eurobondin. Vendi ka rekrutuar Deutsche Bank dhe JPMorgan që ta ndihmojë atë të gjejë investitorë në Europë.
Aktorët e tregut valutor presin që euro të rritet në tregun e brendshëm javët në vijim, si rrjedhojë e kërkesës më të lartë për të./Monitor/
