Pjesëmarrja e Shqipërisë në Europian u duk si maja më e lartë e arritur ndonjëherë në futbollin shqiptar. Mirëpo, në bazë të të dhënave zyrtare të UEFA-s, në lidhje me kompeticionet e saj, shqiptarët rezultojnë të suksesshëm edhe në klubet e tyre. Gazeta “Panorama Sport” është përpjekur të bëjë një bilanc të të gjithë kuqezinjve ndër vite për statistikat interesante.
PËRFAQËSIMI NË CHAMPIONS
Besnik Hasi është tashmë një nga trajnerët më të suksesshëm shqiptarë, mirëpo ai ruan rekorde edhe për periudhën në futbollin e luajtur. Ish-futbollisti i Kombëtares Shqiptare është shqiptari me numrin më të madh të ndeshjeve në Ligën e Kampionëve. I ndjekur nga Xhaka, Haxhi, Cana dhe Sina.
GOLEADORI
Hamdi Salihi ka qenë mjeshtri i roveshatave, mirëpo jo vetëm kaq. Falë asaj që ka bërë në karrierën e tij, ai renditet si bomberi më i mirë shqiptar me golat e shënuar në Ligën e Kampionëve apo edhe në kompeticionet europiane.
Gjashtë të tillë në Champions me Tiranën dhe Skënderbeun. Në këtë listë gjenden edhe Devi Muka, Bushi, Duro, Fortuzi, Kola e Shkëmbi. Në total në Kupat e Europës, Salihi numëron 14 gola të realizuar, më shumë sesa çdo shqiptar tjetër.
“I PALODHURI”
Kapiteni i Kombëtares, Ansi Agolli, është shqiptari me numrin më të madh të ndeshjeve të zhvilluara në Kupat e Europës. Tirana, Nojshatel Ksamaks, Karabak i kanë dhënë mundësinë mbrojtësit kuqezi që të numërojë aktualisht 57 paraqitje në Europë, si asnjë shqiptar tjetër deri më tani. As Lorik Cana, që numëron 56 të tilla dhe e ka mbyllur karrierën si futbollist profesionist.
“TË VEÇANTIT”
Igli Tare është sot një nga drejtuesit shqiptarë më të suksesshëm në arenën ndërkombëtare, mirëpo ish-bomberi shtatlartë i Kombëtares gjendet pjesë e tabelës së statistikave “të veçanta” për shqiptarët.
Ai është i vetmi që ka luajtur në një finale kompeticioni klubesh të UEFA-s. Bledar Kola është shqiptari i parë që luajti në grupet e Champions-it, Hasi i pari që drejtoi një ekip në grupet e këtij kompeticioni, ndërkohë që Besart Berisha është i pari shqiptar që realizoi gol./panoramasport/
a.ç
