Qeveria e kryeministres italiane Giorgia Meloni ka hyrë në histori, duke tejkaluar rekordin për jetëgjatësinë e një kabineti qeveritar në Itali që prej themelimit të Republikës në vitin 1946.
Kabineti i drejtuar nga Meloni ka qëndruar në detyrë për 1 413 ditë, duke kaluar me një ditë qeverinë e dytë të Silvio Berlusconit, e cila drejtoi vendin për 1 412 ditë, nga viti 2001 deri në vitin 2005.
Meloni, e cila drejton edhe partinë e djathtë “Vëllezërit e Italisë”, mori detyrën më 22 tetor 2022, duke u bërë gruaja e parë në historinë e Italisë që mbajti postin e kryeministres.
Rekordi merr një rëndësi të veçantë në një vend të karakterizuar historikisht nga ndryshimet e shpeshta të qeverive. Që prej krijimit të Republikës, Italia ka pasur 68 kabinete qeveritare, me një kohëzgjatje mesatare prej rreth 13 muajsh.
Koalicioni i Melonit, i përbërë nga tre parti të krahut të djathtë dhe forcave konservatore, ndodhet në pushtet prej gati katër vitesh.
Megjithatë, rekordi lidhet vetëm me kohëzgjatjen e pandërprerë të një kabineti të vetëm. Nëse merren në konsideratë të gjitha qeveritë e drejtuara nga i njëjti kryeministër, Berlusconi vazhdon të jetë përpara, me më shumë se nëntë vite në krye të qeverisë italiane. Në këtë klasifikim, Meloni renditet aktualisht e shtata.
Kryeministrja italiane e ka cilësuar jetëgjatësinë e qeverisë së saj si një arritje të rëndësishme politike. Për të shënuar rekordin, partia e saj ka planifikuar një tubim në qytetin portual të Barit, ku Meloni pritet të mbajë edhe një fjalim.
Ndërkohë, kritikët e qeverisë argumentojnë se stabiliteti dhe jetëgjatësia e kabinetit janë kthyer në objektiv më vete, ndërsa akuzojnë qeverinë për ngërç politik në disa fusha.
