Rekordet Botërore Guiness 2015, ja të “çmendurit” e parë të vitit
Nga breshka më e shpejtë deri në gojën me më shumë dhëmbë, një koleksion rekordesh që as nuk kishit guxuar t’i mendonit
Rekordet Botërore Guiness, autoriteti botëror për njerëzit që thyejnë rekorde, feston këtë vit 60-vjetorin nga publikimi i parë i librit të saj. Që kur u publikua për herë të parë në vitin 1955, Libri i Rekordeve Botërore Guinness është shndërruar në fenomen. Ka arritur të shesë 134 milionë kopje në më shumë se 100 vende të botës. 112-vjeçari Yasutaro Koide njihet zyrtarisht si njeriu më i moshuar në botë, sipas librit të Rekordeve Guinness. Koide ka lindur në 13 mars, 1903 dhe ka punuar si rrobaqepës. Ai u bë njeriu më i moshuar në botë pas vdekjes së Sakari Momoit nga Tokioja në korrik, në moshën 112-vjeçare. Po nga Japonia është Misao Okawa, vajza e rrobaqepëses së kimonove. Okawa vdiq në qershor të këtij viti dhe ishte gruaja më e moshuar në botë. Ajo ishte 117 vjeç. Thyesit e rekordeve janë mes atyre që shpalosen në 60 vjetorin e librit Guinness. Si Koide dhe Okawa ishin të rinj kur Hollivudi realizoi filmin Gone with the Wind. Filmi me aktorët Vivien Leigh dhe Clark Gable doli në vitin 1939, por edhe sot, ky film për Luftën Civile Amerikane është filmi me më shumë të ardhura në të gjitha kohërat. Avatar – filmi i parë tredimensional – vjen në vendin e dytë me 2.78 miliardë. Kur Guinness u publikua fillimisht në vitin 1955, ndërtesa Empire State ishte më e larta e ndërtuar ndonjëherë. Ajo dominonte në Nju Jork me një lartësi prej 448.6 metrash, më saktë 443 metra deri në majë. Sot Rekordi Botëror Guinness i takon ndërtesës Burj Khalifa, në Dubai që është 828 metra e lartë. Duhet të jesh tip i veçantë për të hyrë në librin Guinness. E tillë është Lee Redmond e cila zgjati thonjtë për 30 vjet me radhë. Fatkeqësisht ato iu thyen në një aksident me makinë. Kafshët janë gjithmonë popullore për lexuesit e librit Guinness dhe pronarët e tyre janë entuziastë t’i regjistrojnë në librin e rekordeve, në rrugën drejt famës. Zeus, është për shembull qeni më i gjatë në botë – 1 metër e 12 centimetra. Disa rekorde nuk janë të papritura. Albumi Thriller i Michael Jackson-it është ende më i shituri deri më sot me mbi 65 milion kopje.
Ja cilat janë performancat e rekordet më interesante të përzgjedhura këto 12 muaj nga 50 mijë kërkesa të dërguara:
1- Breshka më e shpejtë
Dikush e ka nominuar Usain Bolt-i i breshkave, dhe në fakt performanca e breshkës Bertie është ajo e vrapimit të shpejtë. Zvarraniku anglez ka zhvilluar një distancë prej 5.48 metrash për 19,59 sekondash, duke arritur shpejtësinë 0,28 metra për sekondë. Ajo arriti të thyejë rekordin e një breshke tjetër, e cila të njëjtën distancë arriti ta kryejë për 43.7 sekonda.
2- Këmbët më të gjata
Këmbët më të gjata i përkasin Jeison Orlando Rodriguez Hernandez, nga Venezuela, të cilat arrijnë 40,1 cm e djathta dhe 39,6 e majta.
3- Pellushi më i gjatë i një lepuri
Është 36,5 cm e gjatë dhe i përket Françeskës, një lepuri nga Angora në Angli. Është dy vjeçe. Lepurushja, pellushi i së cilës duhet të trajtohet me kujdes, gjithnjë ngatërrohet me qen pekinez.
4- 100 metra me çizme skish
Çdo i apasionuar i sporteve të dimrit do ta vlerësojë rekordin e Andre Ortolf, nga Gjermania, i cili në mars të vitit 2014 arriti të bëjë 100 metra në 17,65 sekonda, duke veshur një palë çizme skie.
5- 100 metra me nallane
Një vit më parë, përsëri Andre Ortolf, bëri një vrapim të një mënyre tjetër. E njëjta distancë, e përshkuar me nallane hollandeze në këmbë. Në këtë rast e bëri për 16,27 sekonda.
6- Bizelja e dërguar më larg nëpërmjet frymës
Andre Ortolf është një djalë i gjithanshëm dhe gjatë kohës së lirë provon rekorde të reja. Këtë herë ai arriti të fryjë një kokërr bizeleje në distancën 7.31 metra. Rekord botëror.
7- Goja me më shumë dhëmbë
Vijay Kumar nga Bangalore i Indisë ka 37 dhëmbë, 5 më shumë se një gojë normale e një të rrituri.
8- Brirët më të mëdhenj
Ky dem i quajtur “Big Red 907” në Teksas të Shteteve të Bashkuara ka brirët më të gjatë në botë.
9- Furgoni më i madh me hot-dog
Është e vështirë ta imagjinosh një karrocë kaq të madhe që shet hot-dog. Ajo gjendet në Misuri, është 7.06 metra e gjatë, 3.72 metra e lartë dhe 2.81 metra e gjerë.
10- Stilolapsi më i gjatë në botë
I gjatë 5.5 metra, ky stilolaps nuk është i përshtatshëm për xhepin e një xhakete. Peshon 37.23 kg dhe për ta transportuar në rrugët e Indisë u deshën të paktën 4 persona.
11- Çifti më i gjatë i të martuarve
Sun Mingming dhe bashkëshortja e tij, Xu Yan, janë përkatësisht 2.36 dhe 1.87 metra të gjatë. Ata u martuan në vitin 2013.
12- Numri më i madh i rrotullimeve me BMX
21-vjeçari nga Tokjo, Takahiro Ikeda është një mjeshtër i biçikletës BMX. Ai arriti të kryejë 83 rrotullime 360 gradë me biçikletën e tij.
13- Numri më i madh i pritjeve të bëra nga një qen
Purin, një qenushe femër 9 vjeç, është e apasionuar pas futbollit. Ajo arriti të presë 14 gjuajtje në portë për 60 sekonda.
14- Çizmet më të mëdha kauboj
Janë të larta 10.74 metra dhe ndodhen në Teksas, një vend që është i mësuar me porcionet ekstra të mëdha. Ato u realizuan nga 72-vjeçari Bob Wade.
