Shqiptarët vijojnë të përmirësojnë renditjen e tyre në rajon sa i përket motorizimit. Këtë e tregojnë shifrat e automjeteve të regjistruara për herë të parë që këtë vit kanë shënuar një rritje të konsiderueshme.
Sipas Drejtorisë së Transportit Rrugor në vendin tonë gjatë shtatë muajve të parë të vitit 2025, kanë hyrë dhe janë regjistruar për herë të parë 57 mijë e 489 mjete.
Tendenca është në rritje të dukshme, veçanërisht në muajin korrik, kur u regjistruan 10 mijë e 27 mjete, shifra më e lartë e këtij viti.
Rritje kanë shënuar edhe mjetet elektrike. Vetëm në korrik, në rrugët shqiptare janë shtuar 508 mjete me energji të gjelbër, duke e çuar totalin në mbi 2 mijë e 800 që nga fillimi i vitit. Ndërsa qershori shënoi kulmin me 658 regjistrime elektrike.
Sipas standardeve mjedisore, pothuajse gjysma e autoveturave të reja janë Euro 5, ndërsa një tjetër pjesë e konsiderueshme i përket kategorisë Euro 6, duke treguar një prirje drejt mjeteve më pak ndotëse.
Sa i përket origjinës së automjeteve, Koreja e Jugut kryeson me mbi 11 mijë regjistrime, e ndjekur nga Italia, Gjermania dhe Zvicra. Në listë qëndrojnë edhe Shtetet e Bashkuara dhe Kina, që së bashku përbëjnë një burim të rëndësishëm të importit të mjeteve në vend.
Ky zhvillim tregon se tregu i automjeteve po gjallërohet, me konsumatorët që kërkojnë gjithnjë e më shumë alternativa moderne dhe më të qëndrueshme. Në Shqipëri sipas INSTAT qarkullojnë rreth 1 milionë mjete, shumica e të cilave janë autovetura.
