Numri i emigrantëve të paligjshëm që kalojnë Kanalin e La Manshit ka arritur një rekord të ri vjetor, pasi pothuajse 600 persona mbërritën nga Franca në Angli të dielën, raportojnë mediat britanike.
Moti i mirë gjatë fundjavës çoi në një rritje të ndjeshme të numrit të gomoneve që tentuan kalimin, vetëm disa ditë pasi ministrja e Brendshme britanike, Yvette Cooper, njoftoi miliona paund shtesë për të luftuar bandat e trafikimit të qenieve njerëzore, shkruan A2 CNN.
Në total, 592 persona arritën të kalojnë në vetëm 11 gomone, duke e bërë këtë ditën më të ngarkuar që nga dhjetori i kaluar. Kjo e çon numrin e përgjithshëm të emigrantëve të ardhur deri më tani në vitin 2025 në 2716, një shifër më e lartë se 2255 emigrantët që kishin kaluar në të njëjtën periudhë të vitit të kaluar kur qeveria ishte ende nën drejtimin e konservatorëve.
Sekretari i Brendshëm në hije i Partisë Konservatore, Chris Philp, e quajti këtë situatë një “turp të vërtetë” dhe akuzoi laburistët për humbjen e kontrollit mbi kufijtë britanikë. Ai theksoi se anulimi i planit të deportimeve në Ruandë ishte një “gabim katastrofik”.
Ndërkohë, një zëdhënës i kryeministrit Keir Starmer u përgjigj duke thënë se qeveria po merr masa konkrete për të vënë nën kontroll sistemin e azilit dhe për të luftuar bandat e trafikimit. Ai përmendi krijimin e Njësisë së Sigurisë Kufitare dhe rritjen e numrit të deportimeve me 24 për qind.
Marrëveshja mes Britanisë dhe Francës prej 500 milionë paund për të mbikëqyrur plazhet franceze dhe për të ndërtuar një qendër paraburgimi ende nuk është zbatuar plotësisht. Megjithatë, ministri i Brendshëm francez, Bruno Retailleau, ka sinjalizuar se policia franceze do të nisë ndalimin e emigrantëve në ujërat e cekëta.
Që nga viti 2018, vetëm 3 për qind e emigrantëve që kanë kaluar Kanalin janë dëbuar.
