Komisioni i Venecias ka nxjerrë të tjera rekomandime sa i takon Reformës në Drejtësi, duke u bazuar këtë herë në rolin e ministrit të Drejtësisë. Venecia kërkon që Reforma të rishikojë rolin e ministrit në Këshillin e Lartë të Drejtësisë. Po ashtu, Venecia vlerëson se Reforma duhet të përcaktojë në mënyrë të qartë se kush janë instancat që mund të vendosin masa ndaj gjyqtarëve të kushtetueses.
“Ndryshimet kushtetuese sidomos mbi procesin e verifikimit duhet të caktojnë vetëm parimet më të rëndësishme, duke i lënë detajet për legjislacionin zbatues. Duhet të sqarohet kush vendos mbi masat disiplinore ndaj gjyqtarëve të Gjykatës Kushtetuese. Roli i ministrit të Drejtësisë në Inspektoratin e Lartë të Drejtësisë dhe në Këshillin e Lartë Gjyqësor duhet të rishikohet, në mënyrë që të shmangë konfliktin e mundshëm të interesit. Rregullimet duhet të rishqyrtohen për të hequr konfliktin e mundshëm të interesit”.
Ndër të tjera theksohet se “Ministri nuk duhet të ketë karrige në gjykatën disiplinore”.
