“Data 9 nëntor 2016, do të mbetet historike për gjithë shqiptarët, kur në një moment të vështirë për Europën, Komisioni Europian, vlerëson pozitivisht progresin e bërë nga Shqipëria”.
Kështu deklaron Ministrja e Integrimit Klajda Gjosha menjëherë pas rekomandimit të kushtëzuar që dha KE për çeljen e negociatave për Shqipërinë.
Gjosha thekson se “rekomandimi pozitiv, i dhënë sot nga Komisioni Europian, për ne do të thotë: përgjegjësi e angazhime akoma dhe më të mëdha, për të përmbushur të gjitha standardet që ne na afrojnë më shumë me Bashkimin Europian. Ky moment i ri duhet të shërbejë si shtysa më e fortë për zbatimin e të gjitha reformave shtetndërtuese”, tha Gjosha.
Edhe në një lidhje telefonike për News24 ajo theksoi se për Shqipërinë dhe shqiptarët është një ditë e gëzuar. “Deklarata e Hahn vlerëson punën e bërë në 5 pritoritetet. Për mua përgjegjësi edhe më e madhe dhe për të gjithë klasën politike për të vazhduar punën drejt procesit të integrimit. Nga ana tjetër duhet të jemi të vetëdijshëm se kemi shumë punë për të bërë”, tha ajo.
E pyetur nëse pritej kushtëzimi nga KE-ja, Gjosha tha se është normale dhe e pritshme.
“Është normale dhe totalisht e pritshme, sepse e ne e dimë se ndryshimet kushtetuese ishin hapi i parë. Shpresojmë që në dhejtor të kemi një përgjigje nga Venecia për vettingun që reforma në drejtësi të fillojë zbatimin”, tha ajo.
Gjosha tha se dita e sotme, është një arritje e gjithë shqiptarëve, ‘në rrugën tonë pa kthim pas të integrimit europian’. “Ndjehem krenare si qytetare e vendit tim dhe si Ministre e Integrimit që të gjithë bashkë ia dolëm të shohim Shqipërinë të ecë përpara! Një falënderim i veçantë për qytetarët shqiptarë, mbështetësit më besnikë të procesit. Falënderoj institucionet të cilat punojnë çdo ditë për përmbushjen e 5 prioriteteve kyçe dhe veçanërisht Kuvendin e Shqipërisë për rikthimin e besimit në politikën konsensuale dhe konstruktive!”, ka shkruar Gjosha në Facebook.
BW/d.i.
