Pesë persona janë arrestuar sot, 14 dhjetor, nën dyshimin për gjuajtje me armë zjarri në Rrugën e Gjilanit, në Prishtinë.
Policia e Kosovës ka njoftuar se ka reaguar menjëherë duke angazhuar njësitë policore relevante
Zyrtarë policorë nga Stacioni Jugu dhe Sektori i Hetimeve të Kryeqytetit kanë dalë në vendin e ngjarjes, ku gjatë veprimeve të shpejta operative janë arrestuar fillimisht katër persona, si dhe janë sekuestruar armët e përdorura në incident.
Sipas Policisë, pas hetimeve të mëtejme është identifikuar dhe arrestuar edhe personi i pestë, nga i cili gjithashtu është konfiskuar një armë zjarri.
Personat e dyshuar, pas intervistimit dhe në koordinim me Prokurorin e Shtetit, janë dërguar në qeli për 48 orë.
Ata dyshohen për kryerjen e veprave penale: “Përdorim i armës apo mjetit të rrezikshëm”, “Mbajtje në pronësi, kontroll ose posedim i paautorizuar i armëve” dhe “Posedim i paautorizuar i narkotikëve”.
Policia e Kosovës ka bërë të ditur se hetimet lidhur me rastin po vijojnë.
