Diaspora vijon të regjistrohet për t’u bërë pjesë e zgjedhjeve parlamentare të 11 majit.
Që prej 11 janarit, kur Komisioni Qendror i Zgjedhjeve (KQZ) vendosi në funksion platformën elektronike të regjistrimit (PER), ky numër po kalon 60 mijë kërkesa, edhe pse rreth 32 për qind janë refuzuar dhe 7,8 për qind janë në shqyrtim.
Në tabelën e statistikave për të dhënat e regjistrimit të votuesve nga jashtë vërehet se në kategorinë e personave që u është miratuar kërkesa, 3,2 për qind apo mbi 2 mijë qytetarëve me të drejtë vote u kërkohet një dokument identifikimi i ri.
Numri i femrave në kërkesat sipas gjinisë është rritur në krahasim me ditët e shkuara, 21.794 ose 37%, ndërsa në kërkesat sipas grupmoshave, 26–35-vjeçarët vijojnë të kryesojnë.
Në krye vijon të qëndrojë edhe Italia për kërkesat sipas shteteve dhe kryeqyteti, Tirana, sipas qarqeve.
Këshilli i Ministrave miratoi buxhetin shtesë prej 2,5 miliardë lekësh për KQZ, për të mbuluar shpenzimet e postës për zarfet, në vajtje dhe ardhje, të fletës së votimit.
Fleta e votimit pritet të dërgohet me postë-rekomande nga KQZ-ja, siç ka konfirmuar edhe vetë kryekomisioneri Ilirjan Celibashi, në javën e dytë të muajit prill, zarf ky që do t’i dorëzohet vetëm votuesit e jo familjarëve.
Diaspora voton sivjet për herë të parë, ndërkohë që platforma PER do të jetë e hapur deri më 4 mars dhe për dokumentet e nevojshme nevojitet: kartë identiteti ose pasaportë shqiptare dhe për adresë duhet të ngarkojnë në sistem një dokument që përmban adresën e banimit.
