Partia Demokratike ka reaguar sot në lidhje me regjistrimin audio të publikuar nga deputeti i po kësaj force, Sali Berisha.
Në një dalje për mediat, kreu i Grupit Parlamentar Edi Paloka, theksoi se në materialin në fjalë dëgjohet kryeministri Rama duke i kërkuar drejtorëve të administratës të mbledhin vota e të deklarojnë sesa.
Sipas Palokës, edhe pse Rama ka bërë të ditur se bëhet fjalë për drejtorët operacionalë të fushatës, kjo është tentativë për të manipuluar zgjedhjet. Nga ana tjetër ai fajësoi edhe kreun e LSI-së, Ilir Meta, si të përshirë në këtë tentativë vjedhjeje.
“Duket qartazi se Rama dhe Meta edhe këtë herë, më shumë se çdo herë tjetër, të bindur se do të përballen me revoltën popullore në kutitë e votimit, me dëshpërim po përpiqen të manipulojnë zgjedhjet” – tha në fjalëne tij kreu i Grupit Parlamentar demokrat.
