Për herë të parë në Shqipëri do të krijohet një regjistër kombëtar për objektet me bashkëpronësi, ku përfshihet viti i ndërtimit dhe çdo karakteristikë e ndërtesës. Në një intervistë për Tv Klan, ministri i Shtetit për Pushtetin Vendor, Arbjan Mazniku thotë se pas 20 vitesh, ligji për bashkëpronësinë po i nështrohet ndryshimeve ligjore, si një nevojë e rritjes së numrit të ndërtesave dhe hapësirave urbane.
“Ne krijojmë për herë të parë konceptin e një regjistri të bashkëpronësisë, që çdo bashki duhet të mbajë që për çdo objekt, i cili ka elementë bashkëpronësie brenda të jetë i regjistruar, të tregojë volumin e bashkëpronësisë, objekt 5-katësh me 10 hyrje, ka shkallë në bashkëpronësi, ashensor nëse ka, tarracë nëse ka, depo uji, pompë uji dhe mënyra si mirëmbahen, kur mirëmbahen. Regjistri përcakton nëse ka kryesi, administrator.”
Me ndryshimet ligjore, për herë të parë përcaktohet se sa është periudha që objekti duhet t’i nënshtrohet rijetëzimit apo rikonstruksionit për hapësira të veçanta.
“Fillon dhe futet koncepti i nevojës për të bërë disa mirëmbajtje priodike, sa shpesh duhet të mirëmbahet ashensori, duhet një herë në një kohë të lyhet fasdada, të bëhet termoizolimi, në mënyrë periodike duhet pastruar depoja e ujit.”
Nëse deri më tani administratori dilte si rezultat i vullnetit të banorëve, tashmë kthehet në person fiskal.
“Administratori regjistrohet si një person fiskal me NIPT dhe i jepet mundësi të lëshojë faturë, titull ekzekutiv që duhet të paguhet nga të gjithë anëtarët dhe të mblidhet nga enetet përkatëse.”
Sipas Maznikut, çështjet e vogla të bashkëpronësisë në vlerën e 20% të pagës minimale tashmë do të zgjidhen nga Komiteti i Ndërmjetësimit, i krijuar në çdo bashki të vendit, duke mos e çuar çështjen në gjykatë.
Në fazat e konsultimit paraprak, të gjitha bashkitë kanë mirëpritur ndryshimet ligjore si një domosdoshmëri për zhvillimin urban.
