Regjisori nga Kosova, Visar Morina, i cili së fundmi ka realizuar filmin “Babai”, – që është nominuar nga Kosova për kategorinë e filmit më të mirë të huaj në Oscars, është një prej anëtarëve të jurisë në edicionin e 25-të të Cottbus Festival of East European Cinema.
Janë 12-të filma të metrazhit të gjatë të cilët janë pjesë e kësaj gare. Në mesin e tyre janë edhe filmat si “Demon”, “Ungiven”, “Chemo”, “The Wednesday Child”, “Family Film”, “Fair Play”. Edicioni i sivjetmë i Cottbus mbahet nga 3 deri me 8 nëntor. Filmi kryesor i metrazhit të gjatë do të fitojë 42 mijë euro, ndërsa krejt festivali në total jep rreth 80 mijë euro shpërblime për filmat fitues. Cottbus sivjet ka edhe kategori si filmat që trajtojnë homoseksualitetin, Russian Day, Polish Horizons etj. Morina, sipas KultPlus, është një prej emrave më të lakuar të regjisë në Kosovë dhe Gjermani. Ai jeton në Gjermani prej disa kohësh ndërsa së fundmi me filmin “Babai” veç e ka konfirmuar se mbetet një prej regjisorëve që premton shumë.
