“Shumica e aktorëve duan teatër të ri”, kështu shprehet regjisori dhe aktori i njohur, Laert Vasili, i cili nënvizon se zgjidhja më e mirë për artistët dhe artdashësit është ndërtimi i një godine të re moderne.
“Ai që bërtet më shumë duket sikur përfaqëson dhe më shumë njerëz, por kjo nuk është e vërtetë se ka të bëjë me iluzionin që krijohet. Shumica e aktorëve kërkojnë teatër të ri. Unë jam për një teatër të ri. Nuk ke çfarë t’i bësh rikonstruksionit të godinës, kur dhomat e zhveshjes së aktorëve kemi frikë të hyjmë se dyshemeja prej druri mund të rrëshqasë”, u shpreh Vasili në një intervistë për Ora News.
Madje, ai rrëfeu edhe gjendjen e rënduar ku ndodhet sot Teatri Kombëtar. “Flasim për gjithë mekanizmin i cili është i amortizuar, pjesa poshtë skenës, e cila gjatë produksionit “Dama me Kamelie”, ku merrja pjesë, u përmbyt. Aty është një pjesë e elektromotorit që me një shkëndijë mund të marrë flakë kollaj e të hidhet në erë gjithë godina. Pra, flasim për një godinë e cila edhe nga ana e çështjes së arkitekturës nuk përmbush parametrat që duhet të ketë një teatër kombëtar. Një teatër kombëtar kërkon një studim për nga ana akustike, të ketë formën e elipsit sepse në atë mënyrë shpërndahet zëri. Flasim për një godinë teatri e cila është bërë me mbetje industriale, tallashi, asbesti të kohës së Musolinit dhe që edhe vetë italianët kur erdhën u çuditën se si ajo është ende në këmbë. Hyni te prapaskena dhe te dhomat e zhveshjes së teatrit dhe do duket si një mjedis që është i bombarduar”, shtoi ai.
Sipas Vasilit, gjatë dimrit aktorët e kanë të pamundur të performojnë sepse dridhen nga I ftohti. “Mund të citoj këtu produksionin e Makbethit, ku dy nga aktorët që luanin në shfaqje, pas shfaqjes kaluan një muaj e gjysmë, 2 muaj, fizioterapi sepse u kishte ngrirë gjithë sistemi muskulor. Kjo është edhe arsyeja që unë në mbledhje thashë: Ok, në qoftë se do flasim për llaçin, për centimetrat, atëherë dakord mos e bëni teatrin dhe na lini aty, të vuajmë përjetësisht! Humbëm 20 vjet, të humbim edhe 20 të tjerë”, tha ai.
Regjisori Vasili shpreh bindjen se teatri i ri do të jetë një nga modernët më Europë, pasi edhe studio e cila ka paraqitur projektin është një nga më prestigjiozet në botë. “Nga projekti pamë një godinë jashtëzakonisht bashkëkohore, e cila i plotësonte të gjitha kushtet dhe përmasat që kërkon një teatër bashkëkohor, që ashtu si e duan edhe artistët e brezit të vjetër, do i rezistojë të paktën 100 apo 200 vjet kohës. Për mua është një teatër që do e kenë zili dhe vendet më të zhvilluara të Europës. Madje, në një komunikim që kam pasur me një bashkëpunëtorin tim jashtë, pyetja ishte si arritët të kontraktoni këtë lloj arkitekti. Është studio më e madhe e arkitekturës në botë për këto lloj ndërtesash”, vijoi ai.
ma.me
