Autoriteti i Mediave Audiovizive, AMAm, ka gjobitur sot me 2 milion lekë emisionin “E diela shqiptare” të Ardit Gjebresë. Konkretisht rubrika “Shihemi nëgjyq” e këtij emisioni që moderohet nga juristja Eni Cobani në datën 17 prill 2016 ka denigruar një qytetare e cila ka bërë një kërkesë në Këshillin e Ankesave në AMA.
Sipas një njoftimi që ka publikuar në faqen online Autoriteti sqarohet se Tv Klan i është kërkuar që të reagojë pas ankesës që ka bërë qytetarja E. M. nga Përmeti, por drejtuesit e këtij kanali kanë refuzuar.
Duke qënë se përmbajtja e transmetuar është në shkelje të ligjit 97-2013 “Për mediat audiovizive në Republikën e Shqipërisë” si dhe Kodin e Transmetimit të AMA-s atëherë Tv Klan ka marrë gjobën prej 2 milion lekësh. Rreth një vit më parë AMA ka gjobitur dhe një tjetër emision të këtij televizionim “Zonë e lirë” që moderohet nga Arjan Cani, me një vlerë prej 4 milion lekësh.
(tema / r.a)
