Deputeti i Partisë Mundësia, Erald Kapri, i ftuar në studion e News24, ka komentuar ftesën e Partisë Demokratike dhe të kreut të saj, Sali Berisha, drejtuar partive politike për t’u ulur në një tryezë bashkëpunimi kundër qeverisë së Partisë Socialiste.
Kapri u shpreh se Partia Mundësia nuk mund të jetë pjesë e një tryeze ku, sipas tij, drejtuesit kryesorë janë figura të akuzuara për korrupsion. Ai përmendi konkretisht emra si Sali Berisha, Ilir Meta dhe Fatmir Mediu, duke theksuar se mungesa e besueshmërisë në luftën kundër korrupsionit e bën të pamundur një bashkëpunim të tillë.
“Nuk mund të ulemi në një tryezë ku krerët e saj janë të akuzuar për korrupsion. Ne e shohim korrupsionin si problemin kryesor në Shqipëri sot dhe pa besueshmëri në këtë aspekt, nuk mund të na kenë nga pas qytetarët,” u shpreh Kapri.
Ai shtoi se Shqipëria ka nevojë për një model të ri politik, ku ndëshkimi i korrupsionit të jetë thelbësor dhe ku bashkëpunimet të mos kenë si qëllim goditjen e drejtësisë apo mbajtjen e karrigeve politike. Sipas tij, çdo tryezë politike duhet të synojë reforma reale dhe jo interesa personale.
Deputeti i Partisë Mundësia bëri të ditur gjithashtu se kjo forcë politike ka organizuar tryeza të hapura me intelektualë dhe gazetarë, si pjesë e vizionit të saj për dialog publik. Në këtë kuadër, Kapri zbuloi se Partia Mundësi i ka dërguar një ftesë për bashkëpunim edhe Lëvizjes Bashkë, të drejtuar nga Arlind Qori, duke lënë të hapur mundësinë e një afrimi në të ardhmen.
“Ne kemi bërë tryeza me intelektualë të vendit, me gazetarë. Në tryezën që ne bëmë i çuam një ftesë Lëvizjes Bashkë të Arlind Qorit që nuk e vlerësuan, ndoshta në një moment tjetër”, tha ai.
Ju lumte qe rrefuzoni hajdutet,sic eshte monstra e vicidolit,me hajdutet e tije,keshtu fitoni besimin tek votuesit.