Komisioni i Posaçëm për Reformën Territoriale u ndal në Fier për dëgjesë publike ku u diskutua nëse për këtë qark duhen shkrirë bashkitë e vogla në kuadër të kësaj reforme.
Pas diskutimeve me ekspertë dhe përfaqësues të partive politike, kryesocialistja e Fierit, Belinda Balluku tha se qytetarët e Fierit duan të ruajnë këtë ndarje territoriale ndërkohë që të dhënat financiare për bashkite e vogla flasin për performancë të lartë të këtyre të fundit.
Patosi, Rroskoveci dhe Mallakastra janë shembulli konkret sipas Ballukut se ndarja territoriale e vitit 2014 ka prodhuar rezultate të mira e para sepse këto bashki kanë përformancë të mirë financiare dhe e dyta sepse përfaqësojnë si në rastin e Mallakastrës një identitet të fortë tradite dhe kulture.
“Ishte një seancë shumë interesante pavarësisht se kishte edhe pak ngjyrime politike. Dua të falenderoj gjithë komisionin për reformën edhe opozitën gjithashtu, gjithë biseda ishte konstruktive. Dua të them që qytetarët prekën pika kyçe dhe të rëndëishme për reformën territoriale. Sigurisht u diskutua nëse ka patur sukses reforma territoriale e 2014-2015. Pati dëshmi të qarta, sidomos nga bashkitë e vogla, siç është rasti i Roskovecit apo i Patosit që ka funksionuar bashkimi i komunave në bashkime të vogla, megjithatë sot qytetarët thanë fjalën e tyre se si e mendojnë. Si drejtuese politike e qarkut të Fierit duhet të them që patjetër për ne është e rëndësishme që të gjashta bashkitë të ruhen, pasi dy bashkitë e vogla janë bashki me performancë financiare të plotë, pra nuk kanë borxhe ndaj pushtetit vendor. Sot në Roskovec kemi 24 orë ujë, vjen për shkak të punës edhe në këtë njësi bashkiake. Por kemi edhe bashki siç është rasti i Mallakastrës që janë bashki me identitet të fortë dhe që absolutisht nuk mund të përthithen apo të shkrihen në bashki më të mëdha”, u shpreh Balluku.
