Kreu i komisionit parlamentar për Reformën në drejtësi Fatmir Xhafaj, i është kundërpërgjigjur kritikave të Presidentit Nishani për njëanshmëri dhe mungesë transparence. I ftuar në emisionin “Top Show” Xhafaj tha se ndihet i keqardhur për gjuhën e artikuluar nga kreu i shtetit në lidhje me punën e bërë deri më tani për reformën e drejtësisë në komisionin që ai drejton. Xhafaj shtoi se për 7 muaj rradhazi Presidenti nuk dërgoi përfaqësuesit e tij në punimet e komisionit.
“Së pari, jam i keqardhur me gjuhën që përdor Presidenti, me qasjen që ka gjetur, me mënyrën se si i është drejtuar komisionit të posaçëm. Unë e kuptoj që Presidenti i Republikës është kundërshtar politik me mua, ka qenë edhe është për arsye të pozicioneve politike që ka mbajtur dhe pozicioneve politike që mban aktualisht. Ky tashmë është një fakt i njohur, por fakti se ai është në institucionin e Presidentit të Republikës dhe përgjegjësia e tij kushtetuese mbi palët duhet ta bënte Presidentin më të kujdesshëm në këtë artikulim publik. Presidenti i Republikës thotë se është një paraqitje e deformuar, por kush e ka fajin tani pasqyra apo realiteti? Këtë realitet të deformuar, të cilin vetëm po e zbukurove se nuk ke çfarë t’i deformosh më shumë se sa është i deformuar. Presidenti thotë që kjo është e njëanshme dhe këtu ka parasysh që nuk është opozita, por ajo vetëm dy muaj ka që ka ardhur; nuk është faji jonë që i qëndroi larg procesit”, u shpreh Xhafaj.
Kreu i komisionit për reformën në drejtësi shtoi se pjesa e korruptuar e sistemit gjyqësor po ushtron presion dhe se drafti për këtë reformë nuk është një dokument i Partisë Soicialiste, por rezultat i punës së grupit të një sërë ekspertësh jopartiakë.
Në lidhje me ndryshimet kushtetuese, Xhafaj theksoi se amendamentet që do të prekin dokumentin themeltar të shtetit do të jenë pjesë e një pakete të përbashkët, duke përfshirë këtu edhe ndryshimet që do të vijnë nga dekriminalizimi.
