Reforma në Drejtësi, si dhe zhvillimet më të fundit politike në vend, pritet të jenë në qendër të bisedimeve mes ambasadorit amerikan Donald Lu dhe kryetarit të PD-së, Lulzim Basha. Takimi në fjalë ka vetëm pak minuta që ka nisur në selinë qëndrore të PD-së. Prej disa ditësh konstatohet se thuajse nuk ka asnjë lëvizje sa i përket çështjes së Reformës në Drejtësi. PD është tërhequr nga komisioni i posaçëm parlamentar për Reformën në Drejtësi, duke nxjerrë disa kushte të cilat në thelb s’kanë të bëjnë fare me procesin në fjalë. Kushtet e vëna nga PD janë mandatet e deputetëve Raikp Suli dhe Valentina Leskaj, ose siç e emërtojnë ndryshe krerët e PD-së, “zbatimi i vendimeve të Gjykatës Kushtetuese.
Pak para kthimit nga SHBA, Basha premtoi se do të kishte një miratim të shpejtë të Reformës në Drejtësi. Por me të mbërritur në Tiranë, ai ndryshoi qëndrim duke listuar disa kushte, të cilat s’kanë të bëjnë me Reformën në Drejtësi.
Nga ana tjetër kreu i PD-së ka refuzuar deri tani edhe një ftesë publike të bërë nga kryeministri, Edi Rama, për dialog politik me qëllim përshpejtimin e procesit të Reformës në Drejtësi. Takimi mes ambasadorit Lu dhe Bashës, i cili ka pak minuta që ka nisur, synon t’i japë një shtysë procesit, i cili realisht po mbahet peng nga PD.
(javanews.al) M. A
