Kryetari i Komisionit të posaçëm për reformën në drejtësi Fatmir Xhafaj është takuar me James Ëalsh, Zëvendës Sekretar Shteti, Byroja për Çështjet Ndërkombëtare të Zbatimit të Ligjit dhe Narkotikët, Departamenti i Shtetit, SHBA.
Burime për DITA bëjnë të ditur se temë e diskutimit ka qenë rëndësia që ka reforma për vendin dhe nevoja për implementimin shpejtë të saj. Mësohet se takimi ka zgjatur për rreth 30 minuta.
Ndërkohë, në tryezën e sotme konsultative për reformën në drejtësi, ambasadori gjerman në vendin tonë, Hellmut Hoffmann, u ka bërë edhe njëherë të qartë autoriteteve shqiptare dhe aktorëve politikë sesa e rëndësishme është reforma në drejtësi në çuarjen përpara të procesit të integrimit europian.
“Duhet kryer një verifikim i plotë i gjyqtarëve dhe prokurorëve duke filluar nga maja si pjesë thelbësore e një reforme gjyqësore në Shqipëri. Ky verifikim nuk duhet të përfundojë në një farsë të pakuptimtë, thjesht si formalitet. Duhet të jetë e qartë që instrumentet disiplinorë duhet të përdoren vazhdimisht edhe pas këtij verifikimi sa herë të jetë nevoja. Nuk lë përshtypje fare të mirë fakti që janë përdorur kaq pak instrumentet ligjore që janë ekzistuese për ta pastruar gjyqësorin. Pikëpamja e përhapur që ka shumë kundërshti ndaj reformës në sistemin gjyqësor sepse disa funksionojnë sipas avazit të vjetër që gjelat e detit nuk mund të votojnë për Krishtlindjet është jashtëzakonisht e dëmshme për reputacionin e Shqipërisë”, tha Hoffman.
Ambasadori francez, Bernard Fitoussi, ishte më konkret në komentet e tij, kur tha se teksti i Kushtetutës aktuale nuk garanton një pavarësi dhe profesionalitet të shtetit të së drejtës.
Vërejtje pati edhe lidhur me zgjerimin e listës së institucioneve që mund të kenë akses në gjykatën kushtetuese, pasi sipas tij kjo krijon mbingarkesë dhe si rrjedhojë mosefikasitet të këtij institucioni. Gazeta Dita
