Kryeministri Edi Rama dhe kryetari i grupit parlamentar demokrat, Edi Paloka, replikuan me njëri-tjetrin për Reformën në Drejtësi. Pasi foli kryeministri, fjalën e mori Paloka, i cili iu drejtua Ramës se nuk tha asgjë për akuzat në lidhje me reformën.
“Do të ishte mirë të thoshe ndonjë fjalë për akzuat që të janë bërë për sabotimin e Reformës. Bën mirë të mos vazhdosh më të fyesh veriorët e pastaj bën gjasme i do. E dimë ne se sa i do t’i veriorët, vazhdon ta bësh atë dhe e përpiqesh ta lash pastaj”, tha Paloka.
Rama mori menjëherë fjalën, duke bërë kundë-akuzë.
“As nuk ia vlen fare një sekondë e kohës sime, as një sekondë e vëmendjes së PSSH për t’u marrë me fjalimet e retorikat tuaja për Reformën në Drejtësi. Se kush e do Reformën midis nesh e jush, le t’ia lëmë popullit ta gjykojë, vazhdoni të bëni ato tollovitë tuaja. Po ju them vetem kaq, unë e di shumë mirë, ndoshta edhe ju e dini (po ku dini gjë ju), se kush saboton Reformën në Drejtësi do të marrë një përgjigje si nuk e ka marrë asnjëherë në zgjedhjet e ardhshme. Nëse unë jam sabotatori do t’ia lëmë popullit. Do ta shohim në zgjedhjet e ardhshme. Ju s’keni shans të fitoni, se ju s’dini të bëni as opozitë. Ju doni të bëni tollovitë tuaja, bëjini, s’ka problem sabotojeni reformën, do ta shohim në zgjedhje”, ishte përgjigjja e Ramës për Palokën.
