Kryetari i Komisionit të Ligjeve, Fatmir Xhafa, njoftoi të hënën se është arritur marrëveshje me opozitën për reformën në drejtësi.
“Do të ngrihet një komision që do të përbëhet nga 10 anëtarë, 5 nga mazhoranca dhe 5 nga opozita. Shpresoj se roli i opozitës në këtë proces do të jetë konstruktiv. Uroj që ky të jetë një ndryshim i vendimit të Kuvendit jo si akt formal, por t’i shërbejë vendit”, tha Xhafa.
Ndërkohë, deputeti demokrat Eduart Halimi tha: “Reforma është shumë e rëndësishme. Do të falenderoja partnerët ndërkombëtarë dhe kryetarin e komisionit që u tregua fleksibël në arritjen e kësaj marrëveshjeje”.
10:00 – Reforma në drejtësi, ambasadorët Vlahutin dhe Lu takojnë Xhafajn
Më herët ambasadori i SHBA-së, Donald Lu dhe ambasadorja e Bashkimit Europian, Romana Vlahutin u takuan pnë kryesinë e Kuvendit me kryetarin e komisionit parlamentar të Ligjeve, Fatmir Xhafaj, raporton ATA.
Sipas mediave, mendohet që temë e takimit është reforma në drejtësi dhe përfshirja e opozitës në komisionin e posaçëm, të cilin ajo e ka bojkotuar që nga nisja e punës në muajin shkurt.
