SPECIALE JAVANEWS/ Projektligji për Reformën në Drejtësi, ndërsa përpiqet nga njëra anë të disiplinojë sistemin e drejtësis, duke pastruar nga rradhët e këtij sistemi gjykatësit dhe prokurorët e paaftë e të korruptuar, nga ana tjetër duket se ofron një lloj “amnistie” për të gjithë ata persona, të cilët rezultojnë me probleme gjatë procesit të vlerësimit, si të pasurive apo edhe shkeljeve gjatë ushtrimit të detyrës. Në kapitullin për Masat Disiplinore, në draftin e reformës, gjyqtarëve dhe prokurorëve u lihet një “derë e vogël” e hapur se nëse bien dakord me Komisionin e Pavarur të Kualifikimit, “për të dalë në pension më herët”, mund ta marrin pensionin menjëherë. Shuma e pensionit reduktohet duke marrë parasysh vitet e punës të kryera nga gjyqtarët apo prokurorët dhe vitet e mbetura deri në moshën e pensionit. Thënë më thjeshtë, të gjithë ata që largohen “vullnetarisht” nga sistemi i drejtësis, nuk do të jenë më objekt apo subjekt i reformës.
T’ia hedhësh pa lagur
Në draft ka edhe një seri pikëpyetjesh, sidomos për pjesën që ka të bëjë me ata gjyqtarë apo prokurorë, të cilët gjatë procesit të verifikimit të pasurive rezultojnë se kanë pasuri që nuk arrinë ta justifikojnë me atë ardhurat e tyre. Ndërsa drafti sqaron elementët që kanë të bëjnë me masat për t’i larguar ata nga sistemi i drejtësis, duket se lihet pak në hije se çdo të ndodhë me këta gjyqtarë dhe prokurorë, që kanë vënë pasuri nëpërmjet korrupsionit, dhe se nuk e kanë të justifikuar pasurinë në fjalë. Drafti parashikon se barra e provës për pasurinë që ata disponojnë u mbetet atyre. Po në rastin që ata nuk arrinë ta provojnë pasurinë që kanë, çfarë ndodh me ta? Thjeshtë largohen nga sistemi? A do të ndiqen edhe penalisht? Drafti nuk jep një përcaktim të qartë në këtë drejtim. Ndaj duket se një “pension i parakohshëm vullnetar”, do të ishte një lloj “amnistie” për ta. Sa prej gjyqtarëve dhe prokurorëve do të zgjedhin një zgjidhje të tillë mbetet për t’u parë. Por një mundësi “për t’ia hedhur pak pa lagur”duket se e kanë.
(javanews.al) Me. Ar
