Ministri i Punëve të Jashtme dhe Bashkëpunimit Ndërkombëtar i Italisë, Paolo Gentiloni, zhvilloi sot një vizitë të shkurtër në Tiranë për të hapur Konferencën vjetore të Ambasadorëve 2016, me ftesë të Ministrit të Punëve të Jashtme Ditmir Bushati. Konferenca i ofroi Shefit të diplomacisë italiane mundësinë për të ndarë me Ambasadorët e pranishëm disa refleksione mbi të ardhmen e Evropës pas së ashtuquajturës “Brexit” si dhe për të shprehur këndvështrimin italian mbi procesin e intergrimit evropian.
“Edhe nën ndikimin e kërcënimit terrorist, sfidës së emigracionit dhe nevojës për një hov të ri ekonomik në Kontinentin e vjetër, integrimi i Ballkanit në BE shfaqet sot edhe më i rëndësishëm, urgjent dhe strategjik”, tha Ministri Gentiloni, duke konfirmuar mesazhin e dhënë në Samitin e Parisit mbi Ballkanin Perëndimor të mbajtur pak kohë më parë. “Bashkëpunimi italo-shqiptar, në planin ekonomik, të sigurisë dhe të përballimit të flukseve emigruese është një shembull pozitiv”, shtoi Ministri.
Gentiloni veçoi gjithashtu si përparësi të Samitit të ardhshëm mbi Ballkanin Perëndimor, që do të mirëpritet nga Italia në vitin 2017, sfidat e sigurisë (në radhë të parë luftën ndaj eskstremizmi të dhunshëm dhe krimit të organizuar), fenomenet emigruese, çështjet e ndërlidhjes (energjitike dhe të transporteve), por edhe bashkëpunimin ekonomik (me vëmendje të veçantë ndaj NVM-me) dhe kulturor (me synim realizimin e një “Erasmusi Ballkanik”) – gjithnjë duke nxjerrë në pah dimensionin rajonal të procesit të integrimit të Ballkanit Perëndimor.
Në fjalën e tij, Ministri Gentiloni u ndal edhe në procesin e reformimit të sistemit të drejtësisë në Shqipëri. Duke theksuar se miratimi i reformës përbën një përparësi për Vendin, edhe në pritje të hapjes së negociatave për anëtarësimin në BE, Ministri Gentiloni shprehu urimin për realizimin e një reforme konsensuale, si kusht i pashmangshëm për efikasitetin e plotë të saj.
